വാടക ​ഗർഭധാരണത്തിലൂടെ തങ്ങൾക്ക് കുട്ടി പിറന്ന വിവരം കഴിഞ്ഞ ദിവസമാണ് നടി പ്രിയങ്ക ചോപ്രയും ഭർത്താവ് നിക്ക് ജൊനാസ് അറിയിച്ചത്. അതിനു പിന്നാലെ ഇരുവർക്കും ആശംസകൾ അറിയിച്ചുകൊണ്ട് നിരവധി പേരാണ് രം​ഗത്തെത്തിയത്. ഇപ്പോൾ സോഷ്യൽ മീഡിയയിൽ വൈറലാവുന്നത് നടി അനുഷ്ക ശർമയുടെ ആശംസ കുറിപ്പാണ്. ഉറക്കമില്ലാത്ത രാത്രികൾക്കായി തയാറാവാനാണ് പ്രിയങ്കയോട് അനുഷ്ക പറയുന്നത്. 

“പ്രിയങ്കയ്ക്കും നിക്കിനും അഭിനന്ദനങ്ങൾ. ഉറക്കമില്ലാത്ത രാത്രികൾക്കും സമാനതകളില്ലാത്ത സന്തോഷത്തിനും സ്നേഹത്തിനുമായി തയ്യാറാകൂ. കുഞ്ഞിന് ഒരുപാട് സ്‌നേഹം”, ഇൻസ്റ്റ​ഗ്രാം സ്റ്റോറിയിൽ അനുഷ്ക കുറിച്ചു. 

കഴിഞ്ഞ ആഴ്ചയാണ് കുഞ്ഞു പിറന്ന വിവരം പ്രിയങ്ക ആരാധകരെ അറിയിച്ചത്. 'വാടക ഗര്‍ഭധാരണത്തിലൂടെ ഞങ്ങള്‍ ഒരു കുഞ്ഞിനെ സ്വാഗതം ചെയ്‌തെന്ന് വളരെ സന്തോഷത്തോടെ അറിയിക്കുന്നു. ഈ പ്രത്യേക സമയത്ത് ഞങ്ങള്‍ കുടുംബത്തില്‍ ശ്രദ്ധ കേന്ദ്രീകരിക്കുന്നതിനാല്‍ ഞങ്ങള്‍ക്ക് സ്വകാര്യത ആവശ്യമാണ്,'- എന്നാണ് ദമ്പതികൾ കുറിച്ചത്. അതിന് പിന്നാലെ വാടക ​ഗർഭധാരണത്തെക്കുറിച്ച് വലിയ ചർച്ചകൾ സോഷ്യൽ മീഡിയയിൽ നടന്നിരുന്നു. എന്നാൽ കുഞ്ഞ് ജനിച്ചതിനു പിന്നാലെ സോഷ്യൽ മീഡിയയിൽ നിന്ന് മാറി നിൽക്കുകയാണ് താരം. 2018 ഡിസംബര്‍ ഒന്നിനാണ് പ്രിയങ്ക ചോപ്രയും അമേരിക്കന്‍ ഗായകൻ നിക്ക് ജോനാസും വിവാഹം കഴിക്കുന്നത്.