മലയാള സിനിമയിലെ യുവതാരങ്ങളായ അർജുൻ അശോകൻ, റോഷൻ മാത്യു, വിശാഖ് നായർ, ഇഷാൻ ഷൗക്കത്ത് എന്നിവർ ഒന്നിക്കുന്ന ചിത്രമാണ് ചത്താ പച്ച. ചിത്രത്തിന്റെ ട്രെയ്‌ലർ അണിയറപ്രവർത്തകർ പുറത്തുവിട്ടിരിക്കുകയാണിപ്പോൾ. കൊച്ചി ലുലുമാളിൽ വച്ച് കഴിഞ്ഞ ദിവസമായിരുന്നു ചത്താ പച്ച: ദ് റിംഗ് ഓഫ് റൗഡീസിന്റെ ട്രെയ്‌ലർ ലോഞ്ച്.

റീൽ വേൾഡ് എന്റർടൈൻമെന്റിന്റെ ബാനറിലാണ് ചിത്രമൊരുങ്ങുന്നത്. ഒരു മാസ്സ് വിഷ്വൽ ട്രീറ്റ് തന്നെയായിരിക്കും ചത്താ പച്ച എന്നാണ് ട്രെയ്‌ലർ നൽകുന്ന സൂചന. ​ഗുസ്തിയുടെ പശ്ചാത്തലത്തിലൊരുങ്ങുന്ന ചിത്രത്തിൽ നടൻ മമ്മൂട്ടിയും ചിത്രത്തിൽ പ്രധാന വേഷത്തിലെത്തുന്നുണ്ടെന്ന് നേരത്തെ റിപ്പോർട്ടുകൾ വന്നിരുന്നു.

മമ്മൂട്ടിയുടെ സാന്നിധ്യവും ട്രെയ്‌ലറിലുണ്ട്. ഇതോടെ സിനിമാ പ്രേക്ഷകരുടെ ആവേശം ഇരട്ടിയായിരിക്കുകയാണ്. അദ്വൈത് നായർ ആണ് ചിത്രം സംവിധാനം ചെയ്യുന്നത്. ബെന്നി ദയാൽ, വിജയ് യേശുദാസ്, സിദ്ധാർത്ഥ് മഹാദേവൻ, എംസി കൂപ്പർ തുടങ്ങിയ പ്രമുഖ ഗായകരും മ്യൂസിക് & ട്രെയ്‌ലർ ലോഞ്ചിനെത്തിയിരുന്നു.

ക്രിയേറ്റീവ് പ്രൊഡ്യൂസർ ഷിഹാൻ ഷൗക്കത്തിനോടൊപ്പം റിതേഷ് & രമേശ് എസ് രാമകൃഷ്ണൻ, ഷൗക്കത്ത് അലി എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. നേരത്തെ പുറത്തിറങ്ങിയ ചിത്രത്തിന്റെ ടൈറ്റിൽ ട്രാക്കും ടീസറും തരംഗമായി മാറിയിരുന്നു. സനൂപ് തൈക്കൂടമാണ് തിരക്കഥ. ആനന്ദ് സി ചന്ദ്രനാണ് ഛായാ​ഗ്രഹണം. ആക്ഷൻ കലൈ കിങ്‌സൻ. പശ്ചാത്തല സം​ഗീതം മുജീബ് മജീദ്, എഡിറ്റിങ് പ്രവീൺ പ്രഭാകർ. ജനുവരി 22 ന് ചിത്രം തിയറ്ററുകളിലെത്തും.