ബോക്‌സ് ഓഫീസിലെ സമാനതകളില്ലാത്ത കുതിപ്പ് തുടര്‍ന്ന് ബെത്‌ലഹേം കുടുംബ യൂണിറ്റ്. ഓണത്തിന് തിയേറ്ററുകളിലെത്തിയ ചിത്രം, ആഴ്ചകള്‍ പിന്നിടുമ്പോഴും എതിരാളികളില്ലാതെ മുന്നോട്ട് കുതിക്കുകയാണ് ബെത്‌ലഹേം കുടുംബ യൂണിറ്റ്. ഒപ്പമിറങ്ങിയ സിനിമകളേയും, പിന്നാലെ വന്നവരേയും ബഹുദൂരം പിന്നിലാക്കിയാണ് ബെത്‌ലഹേമിന്റെ യാത്ര.

ബോക്‌സ് ഓഫീസില്‍ പുതിയ റെക്കോര്‍ഡിട്ടിരിക്കുകയാണ് ബെത്‌ലഹേം കുടുംബ യൂണിറ്റ്. മലയാള സിനിമ ചരിത്രത്തിലെ ഏറ്റവും വലിയ രണ്ടാമത്തെ ഹിറ്റായി മാറിയിരിക്കുകയാണ് ബെത്‌ലഹേം കുടുംബ യൂണിറ്റ്. ആഗോള തലത്തില്‍ ചിത്രം നേടിയിരിക്കുന്നത് 270 കോടിയാണ്. ഇതോടെ പിന്നിലാക്കിയത് മോഹന്‍ലാല്‍ ചിത്രം എമ്പുരാനെയാണ്. 268 കോടിയായിരുന്നു എമ്പുരാന്‍ നേടിയത്.

എമ്പുരാന്റെ റെക്കോര്‍ഡ് മറി കടക്കാന്‍ ബെത്‌ലഹേമിന് വേണ്ടി വന്നത് വെറും 18 ദിവസം മാത്രമാണ്. ഇതോടെ ബെത്‌ലഹേമിന് മുന്നിലുള്ള ഏക ചിത്രം ലോകയാണ്. ലോകയുടെ കളക്ഷന്‍ 304 കോടിയാണ്. ബെത്‌ലഹേം ഈ കുതിപ്പ് വരും ദിവസങ്ങളിലും തുടരുമെന്നാണ് കരുതുന്നത്. മലയാളത്തില്‍ വലിയ റിലീസുകളൊന്നും അടുത്തായി ഇറങ്ങാനുമില്ലെന്നിരിക്കെ ബെ്തലേഹം ഇന്‍ഡസ്ട്രി ഹിറ്റായി മാറാനുള്ള സാധ്യതയുണ്ടെന്നാണ് വിദഗ്ധര്‍ പറയുന്നത്.

അതേസമയം കേരള ബോക്‌സ് ഓഫീസിലും ബെത്‌ലേഹം വന്‍ മുന്നേറ്റമാണ് നടത്തിയിരിക്കുന്നത്. മോഹന്‍ലാല്‍ ചിത്രം തുടരുമിനെ പിന്നിലാക്കി കേരള ബോക്‌സ് ഓഫീസ് കളക്ഷനില്‍ മൂന്നാം സ്ഥാനത്തേക്ക് എത്തിയിരിക്കുകയാണ് ബെത്ലഹേം. ഇപ്പോഴും നിറഞ്ഞ സദസിന് മുന്നിലാണ് ബെത്‌ലഹേം കുടുംബ യൂണിറ്റ് പ്രദര്‍ശനം തുടരുന്നത്. കഴിഞ്ഞ ദിവസം പുറത്തിറങ്ങിയ ചിത്രത്തിന്റെ തെലുങ്ക്, തമിഴ് പതിപ്പുകളും മികച്ച പ്രതികരണം നേടുന്നുണ്ട്. ബെത്‌ലേഹം കുടുംബ യൂണിറ്റിന്റെ ഫൈനല്‍ കളക്ഷന്‍ എവിടെ ചെന്ന് നില്‍ക്കുമെന്ന് കണ്ടറിയണം.

നിവിന്‍ പോളിയുടെ കരിയറിലെ ആദ്യ 200 കോടി ചിത്രമാണ് ബെത്‌ലഹേം കുടുംബ യൂണിറ്റ്. അതേസമയം തുടര്‍ച്ചയായി മൂന്നാമത്തെ 200 കോടി ചിത്രമാണ് മമിത ബൈജുവിന് ബെത്‌ലേഹം. പ്രേമലുവിന് ശേഷം ഗിരീഷ് എഡി ഒരുക്കിയ ചിത്രത്തിന്റെ നിര്‍മാണം ഭാവന സ്റ്റുഡിയോസ് ആണ്.