ദേശീയ ചലച്ചിത്ര പുരസ്‌കാരത്തില്‍ ആടുജീവിതം തഴയപ്പെട്ടത് വിവാദമായി മാറിയിരിക്കുകയാണ്. കേരള സ്റ്റോറിയ്ക്ക് മികച്ച സംവിധായകനും ഛായാഗ്രാഹകനുമുള്ള പുരസ്‌കാരങ്ങള്‍ ലഭിക്കുകയും ആടുജീവിതം പൂര്‍ണമായും തഴയപ്പെടുകയും ചെയ്തത് ചോദ്യം ചെയ്ത് നിരവധി പേരാണ് രംഗത്തെത്തിയത്. ഇപ്പോഴിതാ ആടുജീവിതത്തിന്റെ സംവിധായകന്‍ ബ്ലെസിയും പ്രതികരിക്കുകയാണ്.

ജൂറി ചെയര്‍മാനായ ആശുതോഷ് ഗവാരിക്കര്‍ നേരത്തെ സിനിമയെക്കുറിച്ച് പുകഴ്ത്തി സംസാരിച്ചിരുന്നുവെന്നും എന്നാല്‍ ചെയര്‍മാനായതോടെ അത് മാറിയത് എങ്ങനെയാണെന്ന് അറിയില്ലെന്നാണ് ബ്ലെസി പറയുന്നത്. ലോറന്‍സ് ഓഫ് അറേബ്യയ്ക്ക് ശേഷം മരുഭൂമി ഇത്രയും മനോഹരമായി ആരും ചിത്രീകരിച്ചിട്ടില്ല എന്നാണ് അന്ന് ആശുതോഷ് പറഞ്ഞതെന്നും ബ്ലെസി ചൂണ്ടിക്കാണിക്കുന്നു.

മന്ത്രി ശിവന്‍കുട്ടിയുടെ പ്രതികരണം കണ്ടു. ഒരു മന്ത്രി ആ രീതിയില്‍ പ്രതികരിച്ചതില്‍ വളരെ സന്തോഷമുണ്ട്. കാരണം ഇത് എന്റെ മാത്രം വിഷയം അല്ലല്ലോ എന്നുള്ള, സമൂഹത്തോടുല്‌ള ഓര്‍മപ്പെടുത്തല്‍ കൂടിയാണ് ആ പ്രതികരണമെന്നും ബ്ലെസി പറയുന്നു. തിരുനന്തപുരത്ത് സിനിമ കോണ്‍ക്ലേവില്‍ സംസാരിക്കുകയായിരുന്നു ബ്ലെസി.

അതേസമയം, ഞാന്‍ അവാര്‍ഡിന് അയച്ച ഒരു സിനിമ, എനിക്ക് അവാര്‍ഡ് കിട്ടിയില്ല എന്നുള്ള പരാതി പറയാന്‍ ആഗ്രഹിക്കുന്നില്ലെന്നും ബ്ലെസി പറയുന്നു. അതിനപ്പുറമായിട്ടുള്ള ചില വിഷമതകള്‍ ഉള്ളതാണ് എന്നുള്ളത് എല്ലാവര്‍ക്കും അറിയാം. അതിന്റെ പിന്നിലെ കാര്യ കാരണങ്ങളൊക്കെ സമൂഹം സംസാരിക്കട്ടെ എന്നും ബ്ലെസില പറയുന്നു.

പ്രതീക്ഷയോടു കൂടി തന്നെയാണ് ദേശീയ അവാര്‍ഡിന് അയച്ചത്. 14 വിഭാഗങ്ങളിലാണ് നോമിനേഷന്‍സ് പോയത്. മനപ്പൂര്‍വ്വമായി തഴഞ്ഞു എന്ന പ്രസ്താവനയ്ക്ക് യാതൊരു പ്രസക്തിയുമില്ല. എനിക്ക് സിനിമ ചെയ്യാനേ അറിയൂ. അതിനകത്തെ മനപ്പൂര്‍വ്വതയോ രാഷ്ട്രീയമോ അറിയില്ലെന്നും ബ്ലെസി പറയുന്നു.

''എവിടെയോ വായിച്ചത് ഈ സിനിമയ്ക്ക് സാങ്കേതികമായി ഉള്ള പിഴവ് കാരണമാണ് പല അവാര്‍ഡുകളും ലഭിക്കാതെ പോയതെന്ന്. ഈ പറഞ്ഞ ആള് ഞാന്‍ ഓസ്‌കാറിന്റെ ക്യാംപെയ്‌നിങുമായി മുംബൈയില്‍ ചെന്നപ്പോള്‍ എന്നെ ഫോണില്‍ വിളിച്ച് ലോറന്‍സ് ഓഫ് അറേബ്യയ്ക്ക് ശേഷം ഇത്രയധികം മനോഹരമായി മരുഭൂമി ഷൂട്ട് ചെയ്തിട്ടുള്ള സിനിമ കണ്ടിട്ടില്ലെന്നാണ് പറഞ്ഞത്. അടുത്ത ദിവസം നമുക്ക് ഒരുമിച്ച് ലഞ്ച് കഴിക്കാം എന്നും പറഞ്ഞിരുന്നു. അത് നടന്നില്ല'' ബ്ലെസി പറയുന്നു.

അങ്ങനെ പറഞ്ഞൊരാള്‍ ചെയര്‍മാന്‍ ആയപ്പോള്‍ എങ്ങനെയാണ് മാറ്റിപ്പറയുന്നത് എന്നുള്ളത് എനിക്കറിയില്ല. ചിലപ്പോള്‍ വീണ്ടും കണ്ടപ്പോള്‍ അദ്ദേഹത്തിന് മനസിലായിക്കാണും അന്ന് പറഞ്ഞത് തെറ്റാണെന്ന്. അങ്ങനെ വിശ്വസിക്കാന്‍ പറ്റുകയുള്ളൂ എന്നും ബ്ലെസി കൂട്ടിച്ചേര്‍ക്കുന്നു.