ഓസ്കർ പുരസ്ക്കാരം നേടിയ ആർആർആറിലെ 'നാട്ടുനാട്ടു' എന്ന ​ഗാനത്തിലെ ചടുലമായ ചുവടുകൾ ഇഷ്ടപ്പെടാത്തവർ ഉണ്ടാകില്ല. എന്നാൽ ആ സി​ഗ്നേച്ചർ സ്റ്റെപ്പുകൾ ഒരുക്കിയ നൃത്ത സംവിധായകൻ പ്രേം രക്ഷിത്തിന് അർഹിക്കുന്ന പരി​ഗണന എവിടെയും ലഭിച്ചില്ലെന്ന് നൃത്തസംവിധായകൻ ബോസ്കോ മാർട്ടിസ്. പ്രേം രക്ഷിത് ഒരിക്കൽ പോലും ഈ ​ഗാനത്തിന്റെ പേരിൽ ആഘോഷിക്കപ്പെട്ടിട്ടില്ലെന്നും അദ്ദേഹം കൂട്ടിച്ചേർത്തു.

നൃത്തസംവിധായകരായ റെമോ ഡിസൂസ, കൃതി മഹേഷ്, വിജയ് ​ഗാം​ഗുലി, ​ഗണേഷ് ആചാര്യ, നർത്തകി ശക്തി മോഹൻ എന്നിവർക്കൊപ്പമുള്ള ഒരു സംവാദ പരിപാടിക്കിടെയാണ് അദ്ദേ​ഹത്തിന്റെ പരാമർശം. നൃത്തസംവിധായകർക്ക് അവർ അർഹിക്കുന്ന പരി​ഗണന ലഭിക്കുന്നില്ലെന്ന് അദ്ദേഹം ചൂണ്ടികാട്ടി. അതിന് ഉദാഹരണമായാണ് നാട്ടു നാട്ടു എന്ന ​ഗാനത്തിന്റെ നൃത്തസംവിധായകൻ രക്ഷിത്തിന്റെ കാര്യം പറഞ്ഞത്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ഓസ്കറിൽ തിളങ്ങിയ ​ഗാനമാണ് നാട്ടു നാട്ടു. അതിന് നൃത്തസംവിധാനം നിർവഹിച്ച പ്രേം രക്ഷിത് എന്തുകൊണ്ട് ആഘോഷിക്കപ്പെടുന്നില്ലെന്നോർത്ത് തനിക്ക് അത്ഭുതം തോന്നി. രാജ്യം മാത്രമല്ല, ലോകം മുഴുവൻ ആ ​ഗാനത്തിനൊത്ത് അദ്ദേ​ഹം ഒരുക്കിയ സി​ഗ്നേച്ചർ സ്റ്റെപ്പ് ചെയ്‌തു. എന്നാൽ അതിന് പിന്നിൽ പ്രവർത്തിച്ച നൃത്തസംവിധായകൻ എവിടെയും ആഘോഷിക്കപ്പെട്ടില്ലെന്നും അദ്ദേഹം വിമർശിച്ചു.

എസ് എസ് രാജമൗലി സംവിധാനം ചെയ്ത ചിത്രത്തില്‍ രാം ചരണും ജൂനിയർ എൻടിആർ തകർത്താടിയ നാട്ടു നാട്ടു എന്ന ​ഗാനത്തിന് 95-ാം ഓസ്കറിൽ ഒറിജിനൽ സ്കോർ വിഭാ​ഗത്തിലാണ് പുരസ്കാരം ലഭിച്ചത്. എംഎം കീരവാണി ഈണമിട്ട ​ഗാനം രാഹുൽ സിപ്ലിഗഞ്ജും കാലഭൈരവനും ചേർന്നാണ് ആലപിച്ചത്.