തെന്നിന്ത്യയിലും ബോളിവുഡിലും ഒരുപോലെ നിറഞ്ഞു നിൽക്കുകയാണ് നടൻ ദുൽഖർ സൽമാൻ. ഇപ്പോൾ ഇതാ തന്റെ മൂന്നാമത്തെ ബോളിവുഡ് ചിത്രം പ്രഖ്യാപിച്ചിരിക്കുകയാണ് താരം. ആര്‍ ബാല്‍കി സംവിധാനം ചെയ്യുന്ന ത്രില്ലർ സിനിമയിലാണ് താരം പ്രധാന വേഷത്തിലെത്തുന്നത്. 

പൂജ ഭട്ട്, സണ്ണി ഡിയോള്‍, ശ്രേയ ധന്വന്തരി എന്നിവരുമാണ് ചിത്രത്തിലെ മറ്റു താരങ്ങൾ. സോഷ്യൽ മീഡിയയിലൂടെ ദുൽഖർ തന്നെയാണ് സന്തോഷം പങ്കുവെച്ചത്. 2022 തുടക്കത്തിൽ തിയറ്ററിലൂടെയാണ് ചിത്രം റിലീസിനെത്തുക. ചിത്രീകരണം വൈകാതെ ആരംഭിക്കും. ചിത്രത്തിന് പേരോ മറ്റു വിവരങ്ങളോ പങ്കുവെച്ചിട്ടില്ല. 

കാര്‍വാന്‍, സോയ ഫാക്ടര്‍ എന്നീ സിനിമകൾക്കു ശേഷം ദുൽഖർ അഭിനയിക്കുന്ന ബോളിവുഡ് ചിത്രമാണിത്. തമിഴ്, തെലുങ്ക് സിനിമയിലും നിറഞ്ഞു നിൽക്കുകയാണ് ദുൽഖർ. പിടികിട്ടാപ്പുള്ളി സുകുമാരക്കുറുപ്പിന്റെ ജീവിതം പറയുന്ന കുറുപ്പാണ് താരത്തിന്റെ പുറത്തിറങ്ങാനിരിക്കുന്ന ചിത്രം. റോഷന്‍ ആന്‍ഡ്രൂസ് സംവിധാനം ചെയ്യുന്ന സല്യൂട്ടും ചിത്രീകരണം പൂർത്തിയാക്കി.