അല്ലു അർജുനും ഫഹദ് ഫാസിലും അഭിനയിക്കുന്ന പുഷ്പയിലെ ​ഡാൻസ് നമ്പറിനെതിരേ കേസ്. സുകുമാർ സംവിധാനം ചെയ്യുന്ന ചിത്രത്തിലെ സാമന്ത അവതരിപ്പിക്കുന്ന ഡാൻസ് ഏറെ ശ്രദ്ധ നേടി‌യിരുന്നു. എന്നാലിത് പുരുഷന്മാരെ മോശക്കാരായി കാണിക്കുന്നുവെന്നാരോപിച്ച് പരാതിയുമായി എത്തിയിരിക്കുകയാണ് മെൻസ് അസോസിയേഷൻ എന്ന സംഘടന. 

പ്രതിഫലം ഒന്നര കോടിയിലധികം?

പാട്ടിന്റെ വരികളിൽ പുരുഷന്മാരെ കാമാസക്തിയുള്ളവരായി ചിത്രീകരിച്ചിരിക്കുന്നെന്നും ഗാനം പിൻവലിക്കണമെന്നുമാണ് പരാതിയിലെ ആവശ്യം. തെലുങ്കിൽ ഇന്ദ്രവതി ചൗഹാൻ ആലപിച്ച ഗാനം മലയാളത്തിൽ രമ്യ നമ്പീശനാണ് ആലപിച്ചിരിക്കുന്നത്. സാമന്തയുടെ കരിയറിലെ തന്നെ ആദ്യ ഡാൻസ് നമ്പറാണ് പുഷ്പയിലെ ഈ ഗാനം. ഇതിനായി താരം ഒന്നര കോടിയിലധികം പ്രതിഫലം വാങ്ങിയെന്ന് റിപ്പോർട്ടുകളുണ്ടായിരുന്നു. 

വില്ലനായി ഫഹദ്

രണ്ട് ഭാ​ഗങ്ങളായാണ് സിനിമ ഒരുങ്ങുന്നത്. ഡിസംബർ 17ന് ചിത്രത്തിന്റെ ആദ്യ ഭാ​​ഗം തിയറ്ററിൽ പ്രദർശനത്തിനെത്തും.  ബൻവാർ സിങ് ഷെഖാവത്ത് ഐ പി എസ് എന്ന പൊലീസ് ഉദ്യോഗസ്ഥന്റെ വേഷത്തിൽ വില്ലൻ കഥാപാത്രത്തിലൂടെയാണ് ഫഹദ് തെലുങ്കിലെത്തുന്നത്. രക്തചന്ദന കടത്തുകാരനായ പുഷ്പരാജായിട്ടാണ് അല്ലു അർജുൻ എത്തുന്നത്. 

‌