തെന്നിന്ത്യന്‍ മാദകറാണി ഷക്കീലയുടെ ജീവിതം പറയുന്ന ഷക്കീല എന്ന ചിത്രം റിലീസിന് ഒരുങ്ങുന്നു. ബോളിവുഡ് സുന്ദരി റിച്ച ഛദ്ദ ഷക്കീലയുടെ വേഷത്തിലെത്തുന്ന ചിത്രം ക്രിസ്മസിന് തീയെറ്ററിലൂടെയാണ് റിലീസ് ചെയ്യുന്നത്. ഇന്ദ്രജിത്ത് ലങ്കേഷ് സംവിധാനം ചെയ്യുന്ന ചിത്രത്തിന്റെ റിലീസ് തിങ്കളാഴ്ചയാണ് പ്രഖ്യാപിച്ചത്. 

ചിത്രത്തിന്റെ പുതിയ പോസ്റ്റര്‍ പങ്കുവെച്ചുകൊണ്ടാണ് റിലീസ് വിവരം ആരാധകരെ അറിയിച്ചത്. ചുവന്ന സാരിയുടുത്ത് കയ്യില്‍ തോക്കുമായി നില്‍ക്കുന്ന റിച്ചയാണ് പോസ്റ്ററില്‍. ഈ വര്‍ഷം ക്രിസ്മസ് ചൂടുള്ളതാവും എന്ന അടിക്കുറിപ്പിലാണ് പോസ്റ്റര്‍ പുറത്തുവിട്ടിരിക്കുന്നത്. 

 
ഒരുകാലത്ത് ആവേശമായിരുന്ന ഷക്കീല 16ാം വയസിലാണ് തന്റെ കരിയര്‍ ആരംഭിക്കുന്നത്. തമിഴ്, തെലുങ്ക്, മലയാളം, കന്നഡ ഭാഷകളിലായി 250 ചിത്രങ്ങളിലാണ് ഷക്കീല വേഷമിട്ടിരിക്കുന്നത്. 

പങ്കജ് ത്രിപതി, മലയാളി താരം രാജീവ് പിള്ളയുമാണ് ചിത്രത്തില്‍ മറ്റ് പ്രധാനവേഷത്തില്‍ എത്തുന്നത്. സമ്മി നന്‍വാനി, സഹില്‍ നന്‍വാനി എന്നിവരാണ് ചിത്രം നിര്‍മിക്കുന്നത്. ഈ വര്‍ഷം ആദ്യം ചിത്രം പുറത്തിറക്കാനാണ് ആദ്യം തീരുമാനിച്ചിരുന്നത്. എന്നാല്‍ കോവിഡിനെ തുടര്‍ന്ന് ലോക്ക്ഡൗണ്‍ പ്രഖ്യാപിച്ചതോടെ റിലീസ് നീണ്ടുപോവുകയായിരുന്നു. ലോക്ക്ഡൗണിന് ശേഷം തീയെറ്ററിലൂടെ റിലീസ് പ്രഖ്യാപിക്കുന്ന മൂന്നാമത്തെ ചിത്രമാണ് ഷക്കീല.