കമൽ ഹാസൻ - ശങ്കർ കൂട്ടുകെട്ടിലെത്തുന്ന ഇന്ത്യൻ 2 വിനായുള്ള കാത്തിരിപ്പിലാണ് സിനിമ പ്രേക്ഷകർ. ചിത്രത്തിന്റെ ഓഡിയോ ലോഞ്ച് കഴിഞ്ഞ ദിവസം നടന്നിരുന്നു. ഓഡിയോ ലോഞ്ചിൽ സംവിധായകൻ ശങ്കറിന്റെ മകളും നടിയുമായ അദിതി ശങ്കറും പങ്കെടുത്തിരുന്നു. ഇതിന് പിന്നാലെ അദിതിയ്ക്കെതിരെ സോഷ്യൽ മീഡിയയിൽ പരിഹാസങ്ങളും ട്രോളുകളുമുയരുകയാണ്. ഇന്ത്യൻ 2 ഓഡിയോ ലോഞ്ചിൽ ശങ്കറിന്റെ സിനിമകളിലെ ​ഗാനങ്ങൾക്കൊപ്പം നൃത്തം ചെയ്യുകയും ചില ​ഗാനങ്ങൾ ആലപിക്കുകയും ചെയ്തിരുന്നു അദിതി.

കാതലൻ സിനിമയിലെ പേട്ട റാപ് ആണ് അദിതി ആലപിച്ചത്. അദിതിയുടെ സ്റ്റേജിലെ ഈ പെർഫോമൻസാണ് ട്രോളുകൾക്ക് വഴിത്തെളിച്ചത്. തന്റെ പെർഫോമൻസിന്റെ വീഡിയോ ഇൻസ്റ്റ​ഗ്രാമിലൂടെ അദിതി പങ്കുവച്ചിരുന്നു. ഇതിന് പിന്നാലെയാണ് കമന്റ് ബോക്സിൽ ട്രോളുകൾ നിറഞ്ഞത്.

ഓൾ ഇൻ ഓൾ അഴകുരാജ എന്ന സിനിമയിലെ കാജൽ അ​ഗർവാളിനെപ്പോലെയുണ്ട് എന്നാണ് ഭൂരിഭാ​ഗം പേരും കമന്റിൽ കുറിച്ചത്. ക്രിഞ്ച് അൾട്ര പ്രോ മാക്സ്, ഇതാണ് നെപ്പോ കിഡ്, ഓവർ ആക്ടിങ്...വിശാലിന്റെ സഹോദരിയാണോ എന്നൊക്കെയാണ് കമന്റ് ബോക്സിൽ ആളുകൾ കുറിച്ചിരിക്കുന്നത്. എന്നാൽ അദിതിയുടെ പെർഫോമൻസിന് കൈയ്യടിക്കുന്നവരും കുറവരല്ല. ആളുകൾ പലതും പറയും, നിങ്ങൾ നിങ്ങളായി തുടരുകയെന്നാണ് ചിലർ കുറിച്ചിരിക്കുന്നത്.

എന്തായാലും അദിതിയുടെ പെർഫോമൻസ് സോഷ്യൽ മീഡിയയിൽ വൈറലായിക്കഴിഞ്ഞു. കാർത്തി നായകനായെത്തി 2022 ൽ പുറത്തുവന്ന വിരുമൻ എന്ന ചിത്രത്തിലൂടെയാണ് അദിതി സിനിമയിൽ അരങ്ങേറുന്നത്. ശിവകാർത്തികേയനൊപ്പം മാവീരനിലും അദിതി നായികയായെത്തി.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

വിഷ്ണുവർധൻ സംവിധാനം ചെയ്യുന്ന പുതിയ ചിത്രത്തിലാണ് അദിതിയിപ്പോൾ അഭിനയിച്ചു കൊണ്ടിരിക്കുന്നത്. ​ഗനി എന്ന ചിത്രത്തിലൂടെ തെലുങ്ക് സിനിമയിൽ പിന്നണി ​ഗാനരം​ഗത്തും അദിതി കഴിവു തെളിയിച്ചിരുന്നു. വിരുമനിലും, മാവീരനിലും അദിതി പാട്ടുകൾ പാടിയിട്ടുമുണ്ട്.