ഹോളിവുഡിലെ മുന്‍നിര താരമാണ് എമ്മ സ്‌റ്റോണ്‍. ഓസ്‌കര്‍ പുരസ്‌കാര ജേതാവായ താരത്തിന്റെ പേരിനേക്കുറിച്ചുള്ള തുറന്നു പറച്ചിലാണ് ഇപ്പോള്‍ ചര്‍ച്ചയായിരിക്കുന്നത്. തന്റെ യഥാര്‍ത്ഥ പേര് വിളിക്കുന്നതാണ് ഇഷ്ടം എന്നാണ് താരം തുറന്നു പറഞ്ഞത്. എമിലി എന്നാണ് എമ്മയുടെ യഥാര്‍ത്ഥ പേര്.

അടുത്തിടെ ഒരു അഭിമുഖത്തില്‍ വച്ചാണ് എമിലി എന്ന പേരിനോടുള്ള ഇഷ്ടം താരം തുറന്നു പറഞ്ഞത്. നടന്‍ നഥാന്‍ ഫീല്‍ഡറിനൊപ്പമായിരുന്നു അഭിമുഖം. അതിനിടെ ദി കഴ്‌സ് എന്ന ടിവി ഷോയിലെ അഭിനേതാക്കളും അണിയറ പ്രവര്‍ത്തകരുമെല്ലാം എമ്മ സ്റ്റോണിനെ എമിലി എന്നാണ് വിളിച്ചിരുന്നത് എന്ന് വ്യക്തമാക്കി. തന്നെ എമ്മ എന്നോ എന്ത് വേണമെങ്കിലുമോ വിളിക്കാം എന്നാണ് താരം ആദ്യം പ്രതികരിച്ചത്. അതിനിടെ കാണികളില്‍ ഒരാള്‍ താരത്തെ എമിലി എന്ന് വിളിച്ചു. ഇതോടെയാണ് എമിലിയായിട്ട് ഇരിക്കാനാണ് തനിക്ക് ഇഷ്ടം എന്ന് തുറന്നു പറഞ്ഞത്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

എമിലി ജീന്‍ സ്റ്റോണ്‍ എന്നാണ് താരത്തിന്റെ യഥാര്‍ത്ഥ പേര്. എന്നാല്‍ എമിലി സ്റ്റോണ്‍ എന്ന പേര് മറ്റൊരു താരം രജിസ്റ്റര്‍ ചെയ്തിട്ടുള്ളതിനാലാണ് എമ്മ സ്റ്റോണ്‍ എന്ന പേര് സ്വീകരിക്കുന്നത്. ഹോളിവുഡില്‍ എമ്മ എന്ന പേരിലാണ് താരം അറിയപ്പെടുന്നതെങ്കിലും താരവുമായി അടുപ്പമുള്ളവരെല്ലാം എമിലി എന്നാണ് വിളിക്കുന്നത്. ലാലാ ലാന്‍ഡിലൂടെയാണ് എമ്മയെ തേടി 2017ല്‍ ആദ്യ ഓസ്‌കര്‍ എത്തുന്നത്. പുവര്‍ തിങ്‌സ് എന്ന സിനിമയിലെ പ്രകടനത്തിന് താരത്തിന് ഈ വര്‍ഷവും ഓസ്‌കര്‍ ലഭിച്ചിരുന്നു.