മുഖത്ത് കൂടുതൽ തിളക്കം വന്ന് സുന്ദരിയാകാൻ വേണ്ടിയാണ് നടി റെയ്സ വിൽസൺ ഫേഷ്യൽ ട്രീറ്റ്മെന്റ് എടുത്തത്. എന്നാൽ സംഭവിച്ചത് നേരെ തിരിച്ചായിരുന്നു. മുഖത്ത് നീരുവന്ന് വീർത്ത് നീലച്ച മുഖവുമായി നിൽക്കുന്ന തന്റെ ചിത്രം പങ്കുവെച്ചുകൊണ്ട് ചികിത്സയിലുണ്ടായ പിഴവ് ചൂണ്ടിക്കാണിച്ചിരിക്കുകയാണ് താരം. ചികിത്സക്കിടെ ഡോക്ടറിനു ഗുരുതരമായ പിഴവുണ്ടായെന്നാണ് റെയ്സ ആരോപിച്ചത്. 

കണ്ണിന് താഴെ നീരുവന്ന് നിറം മാറിയ നിലയിലാണ് റെയ്സ. ത്വക്ക് ചികിത്സയ്ക്കെത്തിയ ക്ലിനിക്കിന്‍റെയും ഡോക്ടറുടെയും പേര് വിവരങ്ങളും നടി സമൂഹമാധ്യമത്തിലൂടെ പങ്കുവച്ചു. ചികിത്സ പിഴച്ചതിനെ തുടർന്ന് ഡോക്ടറെ കാണാനും സംസാരിക്കാനും ശ്രമിച്ചെന്നും എന്നാൽ സാധിച്ചില്ലെന്നുമാണ് താരം പറയുന്നത്. 

‘ഫേഷ്യല്‍ ട്രീറ്റ്‌മെന്റിനാണ് പോയത്. എന്നെ നിര്‍ബന്ധിച്ച് ഒരു ചികിത്സയ്ക്ക് വിധേയയാക്കി. അതെനിക്ക് ആവശ്യമില്ലാത്തതായിരുന്നു. അന്തിമഫലം ഇതാണ്. ഡോക്ടറെ കാണാനും സംസാരിക്കാനും ശ്രമിച്ചു. എന്നാല്‍ അവര്‍ സമ്മതിക്കുന്നില്ല. ഡോക്ടര്‍ ടൗണിന് പുറത്ത് പോയിരിക്കുകയാണെന്നാണ് ജോലിക്കാര്‍ പറയുന്നത്.’-റെയ്സ കുറിച്ചു.

തമിഴ് സിനിമയിലൂടെ ശ്രദ്ധനേടിയ താരമാണ് റെയ്സ. തമിഴ് ബിഗ് ബോസ് ആദ്യ സീസണിലെ മത്സരാർത്ഥിയായിരുന്നു. തിരക്കേറിയ മോഡലും കൂടിയാണ് റെയ്സ. ആലീസ്, കാതലിക്ക യാരുമില്ലൈ, ഹാഷ്ടാഗ് ലവ് എന്നീ ചിത്രങ്ങളാണ് റെയ്സയുടേതായി പുറത്തിറങ്ങാനുള്ളത്.