സംവിധാനത്തിന് പുറമേ അഭിനയത്തിലും ശ്രദ്ധ കേന്ദ്രീകരിച്ചിരിക്കുകയാണ് ​ഗൗതം വാസുദേവ മേനോനിപ്പോൾ. നടൻ യോ​ഗി ബാബുവിനൊപ്പമുള്ള ​ഗൗതം മേനോന്റെ രസകരമായ ഒരു റീലാണിപ്പോൾ സോഷ്യൽ മീഡിയയുടെ മനം കവരുന്നത്. തമിഴ് റാപ്പറായ പാൽ ദബ്ബയ്ക്കും യോ​ഗി ബാബുവിനുമൊപ്പം ഒരു കാറിലിരുന്ന് 1986 ൽ പുറത്തിറങ്ങിയ കമൽ ഹാസൻ ചിത്രം വിക്രത്തിലെ 'വനിതാമണി' എന്ന ഇളയരാജയുടെ പാട്ട് ആസ്വദിക്കുകയാണ് ​ഗൗതം മേനോൻ.

'മഴ വരാൻ പോകുന്നു!! വേറെ എന്താണ് വരാൻ പോകുന്നതെന്ന് നിങ്ങൾക്ക് അറിയാമോ ?' എന്ന അടിക്കുറിപ്പോടെയാണ് ​ഗൗതം മേനോൻ വിഡിയോ പങ്കുവച്ചിരിക്കുന്നത്. എന്നാൽ യോ​ഗി ബാബുവുമായി ഏതെങ്കിലും പ്രൊജക്ടിൽ ​ഗൗതം മേനോൻ സഹകരിക്കുന്നുണ്ടോയെന്നാണ് പ്രേക്ഷകർ ഉറ്റുനോക്കുന്നത്.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

നിങ്ങൾ രണ്ടു പേരും ഒന്നിച്ചുള്ള കോമ്പോ പ്രതീക്ഷിക്കുന്നുവെന്നാണ് ചിലർ കുറിച്ചിരിക്കുന്നത്. എന്നാൽ ധ്രുവനച്ചത്തിരത്തിന്റെ എന്തെങ്കിലും അപ്ഡേറ്റ് തരാമോ എന്ന് ചോദിക്കുന്നവരും കുറവല്ല. അതേസമയം മമ്മൂട്ടിയെ വച്ച് ആദ്യ മലയാള ചിത്രം സംവിധാനം ചെയ്യാനുള്ള ഒരുക്കത്തിലാണ് ​ഗൗതം മേനോനെന്ന് മുൻപ് റിപ്പോർട്ടുകൾ വന്നിരുന്നു. എന്നാൽ ഇത് സംബന്ധിച്ച് ഔദ്യോ​ഗിക സ്ഥിരീകരണമൊന്നും വന്നിട്ടില്ല.