എൻഡിഎയുടെ രാഷ്ട്രപതി സ്ഥാനാർത്ഥി ദ്രൗപതി മുർമ്മുവിനെക്കുറിച്ചുള്ള ബോളിവു‍ഡി സംവിധായകൻ രാം ​ഗോപാൽ വർമയുടെ പരാമർശം വിവാദത്തിൽ. ദ്രൗപതി മുർമ്മുവിനെ മഹാഭാരതത്തിലെ ദ്രൗപതിയോട് ഉപമിക്കുകയായിരുന്നു. 'ദ്രൗപതി പ്രഡിസന്റ് ആവുകയാണെങ്കിൽ ആരായിരിക്കും പാണ്ഡവരാവുക. ഏറ്റവും പ്രധാനപ്പെട്ടത് ആരായിരിക്കും കൗരവരാവുക'. എന്നാണ് രാം ​ഗോപാൽ വർമ ട്വീറ്റ് ചെയ്ത്. 

ഇതിനു പിന്നാലെ ബിജെപി രൂക്ഷ വിമർശനവുമായി രം​ഗത്തെത്തി. രാം ഗോപാൽ വർമ്മ പിന്നാക്ക വിഭാഗങ്ങളെ അപമാനിച്ചുവെന്ന് കാട്ടി തെലങ്കാന ബിജെപി പൊലീസിൽ പരാതി നൽകി. ഇതോടെ വിശദീകരണവുമായി രാം ​ഗോപാൽ വർമ രം​ഗത്തെത്തി. മഹാഭാരതത്തിൽ തനിക്ക് ഏറ്റവും ഇഷ്‌ടപ്പെട്ട കഥാപാത്രമാണ് ദ്രൗപതിയെന്നും ആരുടെയും വികാരങ്ങളെ വ്രണപ്പെടുത്താൻ ഉദ്ദേശിച്ചായിരുന്നില്ല എന്നുമായിരുന്നു വിശദീകരണം. 

തമാശയായിട്ടാണ് ഇത് ഞാന്‍ പറഞ്ഞത്. അല്ലാതെ മറ്റൊരു രീതിയിലുമല്ല. മഹാഭാരരത്തിലെ എന്റെ ഏറ്റവും പ്രിയപ്പെട്ട കഥാപാത്രമാണ് ദ്രൗപതി. ഈ പേര് വളരെ വിരളമായതിനാലാണ് മറ്റ് കഥാപാത്രങ്ങളുമായുള്ള ബന്ധം ഓര്‍ത്തുപോയത്. ആരുടേയും വികാരം വ്രണപ്പെടുത്തണമെന്ന് ഉണ്ടായിരുന്നില്ല.- രാം ഗോപാല്‍ വര്‍മ കുറിച്ചു.

എൻ‌ഡി‌എ രാഷ്‌ട്രപതി സ്ഥാനാർത്ഥിയായി ദ്രൗപതി മുർമ്മു ഇന്നലെയാണ് നാമനിർദ്ദേശപത്രിക സമർപ്പിച്ചത്. പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ അടക്കം നിരവധി മുന്നണി നേതാക്കളോടൊപ്പമെത്തിയാണ് അവർ പത്രിക സമർപ്പിച്ചത്. ജൂലായ് 18നാണ് രാഷ്‌ട്രപതി തിരഞ്ഞെടുപ്പ്.

ഈ വാര്‍ത്ത കൂടി വായിക്കൂ

'ദുൽഖറിന്റെ വാപ്പയോട് പറയട്ടെ പ്യാലിയെ ദുൽഖറിനെക്കൊണ്ട് കെട്ടിക്കാൻ'; രസകരമായ ടീസർ

സമകാലിക മലയാളം ഇപ്പോള്‍ വാട്ടസ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ