'കാട്ടാളൻ' സിനിമയിലെ നടൻ ജ​ഗദീഷിന്റെ ലുക്ക് മലയാള സിനിമാ പ്രേക്ഷകർക്കിടയിൽ ഏറെ ചർച്ചയായി മാറിയിരുന്നു. അലി എന്ന കഥാപാത്രമായാണ് ചിത്രത്തിൽ ജ​ഗദീഷ് എത്തിയത്. ചിത്രത്തിനായി താൻ വി​ഗ് വച്ചത് അല്ലെന്നും മുടി വളർത്തിയതാണെന്നും പറയുകയാണിപ്പോൾ ജ​ഗ​ദീഷ്. ക്യൂബ്സ് എന്റർടെയ്ൻമെന്റ്സിന് നൽകിയ അഭിമുഖത്തിൽ സംസാരിക്കുകയായിരുന്നു നടൻ.

"ടീസറും ട്രെയ്‌ലറുമൊക്കെ കണ്ടിട്ട് പലരും പറഞ്ഞു നല്ല വി​​ഗ്​ ആണെന്ന്. വി​ഗ് ഒന്നുമല്ല, ഇതിനുവേണ്ടി, ഓരോ കാരക്ടർ ചെയ്യുമ്പോഴും ഇതൊന്നും വലിയ ത്യാ​ഗമൊന്നുമല്ല. ആ കാരക്ടർ നന്നാക്കാൻ വേണ്ടി നമ്മൾ ചെയ്യേണ്ട ഉത്തരവാദിത്വമാണ്. എന്നാൽ പോലും ഞാൻ പ്രേക്ഷകരോട് പറയുകയാണ്.

ഇത്രയും വലിയൊരു പടത്തിനു വേണ്ടി ഒരുപാട് ദിവസം, പറഞ്ഞതിനേക്കാൾ കൂടുതൽ ഒരുപാട് ദിവസം നമുക്ക് ഈ പടത്തിനായി ഡേറ്റ് കൊടുക്കേണ്ടി വന്നു. പക്ഷേ അതിലൊന്നും എനിക്ക് പരിഭവമോ വിഷമമോ ഇല്ല. നല്ലൊരു ചിത്രത്തിന്റെ ഭാ​ഗമാകുമ്പോൾ ഒന്ന് രണ്ട് ചിത്രങ്ങൾ മിസ് ആയാലും കുഴപ്പമില്ല.

ഈ മേക്കപ്പും ആയിട്ട് മറ്റ് ചിത്രങ്ങളിൽ പോയി അഭിനയിക്കാനും ബുദ്ധിമുട്ടായിരുന്നു. എന്റെ ലുക്കിൽ കാണുന്നത് ഒരു കാരണവശാലും വി​ഗ് അല്ല. ഞാൻ തന്നെ വളർത്തിയ എന്റെ മുടിയുടെ ​ഗെറ്റഅപ് ആണ്".- ജ​ഗദീഷ് പറഞ്ഞു.

അതോടൊപ്പം തിന്മ കുറഞ്ഞവരുടെ കൂട്ടത്തിൽപ്പെടുത്താവുന്ന കഥാപാത്രമാണ് കാട്ടാളനിൽ തനിക്കെന്നും ജ​ഗദീഷ് പറഞ്ഞു. ഇങ്ങനെയൊരു കഥാപാത്രം കിട്ടിയതിൽ താൻ വളരെ സന്തോഷവാനാണെന്നും ജ​ഗദീഷ് കൂട്ടിച്ചേർത്തു.

അതേസമയം ആന്റണി പെപ്പെ നായകനായെത്തുന്ന കാട്ടാളൻ മെയ് 28 നാണ് തിയറ്ററുകളിലെത്തുന്നത്. പോൾ ജോർജ് സംവിധാനം ചെയ്യുന്ന ചിത്രം ഷെരീഫ് മുഹമ്മദ് ആണ് നിർമിക്കുന്നത്. സുനിൽ, ദുഷാര വിജയൻ എന്നിവരും ചിത്രത്തിൽ മറ്റു പ്രധാന കഥാപാത്രങ്ങളായെത്തുന്നുണ്ട്.