മധുരമുള്ള പ്രണയകഥയുമായി നടൻ ജോജു ജോർജ്. അഹമ്മദ് ഖബീർ കഥയെഴുതി സംവിധാനം ചെയ്യുന്ന മധുരം സിനിമയുടെ ടീസറാണ് പുറത്തുവന്നത്. ശ്രുതി രാമചന്ദ്രനാണ് ചിത്രത്തിൽ നായികയായി എത്തുന്നത്. ഇരുവരും തമ്മിലുള്ള പ്രണയനിമിഷങ്ങൾ ഉൾപ്പെടുത്തിക്കൊണ്ടാണ് ടീസർ. 

അപ്പു പാത്തു പപ്പു ക്രിയേഷൻസിന്റെ ബാനറിൽ ജോജു ജോർജ്, സിജോ വടക്കൻ എന്നിവർ ചേർന്നാണ് ചിത്രം നിർമിക്കുന്നത്. അർജുൻ അശോകൻ  നിഖിലാ വിമൽ, ഇന്ദ്രൻസ് തുടങ്ങിയവരും പ്രധാന വേഷങ്ങളിൽ എത്തുന്നുണ്ട്. ഒരു പ്രണയ കഥയാണ് മധുരം പറയുന്നത്. പ്രധാന  താരങ്ങളോടൊപ്പം തന്നെ നൂറോളം മറ്റു താരങ്ങളും  ഈ സിനിമയിൽ അണിനിരക്കുന്നു. 

ജൂൺ എന്ന ചിത്രത്തിന് ശേഷം ഖബീർ കഥയെഴുതി സംവിധാനം ചെയ്യുന്ന ചിത്രമാണ് മധുരം. ജിതിൻ സ്റ്റാനിസ്‌ലാസാണ് കാമറ. ആഷിക് ഐമർ, ഫാഹിം സഫർ എന്നിവർ ചേർന്നാണ് തിരക്കഥ എഴുതിയിരിക്കുന്നത്. വിനായക് ശശികുമാറിന്റെ വരികൾക്ക് ഹിഷാം അബ്‌ദുൾ വഹാബ് ആണ് സംഗീതം നൽകിയിരിക്കുന്നത്. എഡിറ്റിങ് മഹേഷ്‌ ബുവനെന്തു.