ബോളിവുഡ് താരദമ്പതിമാരായ അജയ് ദേവ്ഗണിന്റെയും കാജോളിന്റെയും മകള്‍ നൈസയുടെ നൃത്തവിഡിയോയാണ് സോഷ്യല്‍ മീഡിയയില്‍ ശ്രദ്ധനേടുന്നത്. സിംഗപൂരില്‍ പഠിക്കുന്ന നൈസ സഹപാഠികള്‍ക്കൊപ്പം സ്‌കൂളില്‍ അവതരിപ്പിച്ച നൃത്തത്തിന്റെ വിഡിയോയാണ് ഇപ്പോള്‍ വൈറലാകുന്നത്. ബോളിവുഡ് ഗാനങ്ങള്‍ക്കാണ് നെസയും സംഘവും ചുവടുവയ്ക്കുന്നത്. 

ഒരേ വസ്ത്രം ധരിച്ച് സ്‌റ്റേജിലെത്തിയ നൈസയും സുഹൃത്തുക്കളും അമ്മയുടെ തന്നെ സിനിമയായ കഭി ഖുഷി കഭി ഗമ്മിലെ ബോലെ ചൂടിയ എന്ന ഗാനത്തിനാണ് ആദ്യം നൃത്തം ചെയ്തത്. പിന്നീട് മൈ നെയിം ഈസ് ഖാനിലെ തേരെ സജ്ദ, നൈന എന്നീ ഗാനങ്ങള്‍ക്കും ചുവടുവച്ചു. ജബ് വീ മെറ്റിലെ നഗാഡ എന്ന ഗാനത്തോടെയാണ് ഇവര്‍ നൃത്തം അവസാനിപ്പിച്ചത്. 

കോവിഡ് ലോക്ക്ഡൗണ്‍ കാലത്ത് നാട്ടില്‍ തിരിച്ചെത്തിയിരുന്ന നൈസ കഴിഞ്ഞ സെപ്തംബറിലാണ് സിംഗപൂരിലേക്ക് മടങ്ങിയത്.