മലയാളികളുടെ മനസിൽ നൊമ്പരമാവുകയാണ് മുട്ടാർ പുഴയിൽ വീണു മരിച്ച വൈ​ഗ. അച്ഛൻ സനു മോഹനൊപ്പം സർപ്രൈസ് കാണാൻ ഇറങ്ങിത്തിരിഞ്ഞ കുഞ്ഞിനെ പിന്നെ കാണുന്നത് മുങ്ങിമരിച്ച നിലയിലാണ്. അന്വേഷണം പുരോ​ഗമിക്കുന്ന കേസിൽ ഇതുവരെ തുമ്പുണ്ടാക്കാൻ പൊലീസിനായിട്ടില്ല. മരണത്തിലേക്ക് വീണു പോയില്ലായിരുന്നെങ്കിൽ ഇപ്പോൾ തന്റെ പുതിയ ചിത്രത്തിന്റെ സന്തോഷത്തിലായിരുന്നാനെ ഈ കൊച്ചുമിടു‌ക്കി. ചിത്രഹാർ എന്ന സിനിമയിലൂടെയാണ് വൈ​ഗ അഭിനയത്തിലേക്ക് ചുവടുവയ്ക്കാൻ ഒരുങ്ങിയത്. 

നാലുസംവിധായകരുടെ അഞ്ചു കഥകൾ കോർത്തിണക്കി ഒരുങ്ങുന്ന സിനിമയാണ് ‘ചിത്രഹാർ. പുതുമുഖ സംവിധായകനായ ഷാമോൻ നവരംഗ് സംവിധാനം ചെയ്യുന്ന ബില്ലിയിലാണ് വൈ​ഗ അഭിനയിച്ചത്. ചിത്രത്തിന്റെ ഷൂട്ടിങ് പൂർത്തിയാക്കി ഡബ്ബിങ് തുടങ്ങാനിരിക്കെയാണ് കുഞ്ഞിൻെറ അപ്രതീക്ഷിത മരണം. 

‘‘അഞ്ചുദിവസമേ ഷൂട്ടിങ് ഉണ്ടായിരുന്നുള്ളൂ. വൈഗ നന്നായി അഭിനയിച്ചിരുന്നു. അവരുടെ ഫ്ളാറ്റിൽ താമസിച്ചിരുന്ന മറ്റൊരു സംവിധായിക വഴിയാണ് വൈഗയെ കണ്ടതും അഭിനയിക്കാൻ തിരഞ്ഞെടുത്തതും’’ -സംവിധായകൻ ഷാമോൻ നവരംഗ് പറയുന്നു. അഞ്ചുചിത്രങ്ങളിൽ ‘ബില്ലി’യുടെ ഡബ്ബിങ് മാത്രമാണ് പൂർത്തിയാകാനുള്ളത്. വൈഗയുടെ ശബ്ദം മറ്റൊരാളെക്കൊണ്ട് ചെയ്യിപ്പിക്കാനൊരുങ്ങുകയാണ് ചിത്രത്തിന്റെ അണിയറക്കാർ.

ആലപ്പുഴയിലെ ബന്ധുവീട്ടിൽനിന്ന്‌ കാക്കനാട് കങ്ങരപ്പടിയിലെ ഫ്ളാറ്റിലെത്തി പുറത്തുപോയ വൈ​ഗയേയും സനു മോഹനേയും കഴിഞ്ഞ 22-ന് കാണാതാവുകയായിരുന്നു. പിന്നീട് വൈഗയുടെ മൃതദേഹം മുട്ടാർപുഴയിൽനിന്ന് ലഭിച്ചു. പിതാവ് സനുമോഹന്റെ വാഹനം വാളയാർ അതിർത്തികടന്ന്‌ പോയതായി സ്ഥിരീകരിച്ചെങ്കിലും എവിടെയുണ്ടെന്ന് കണ്ടെത്താൻ പോലീസിന് കഴിഞ്ഞിട്ടില്ല.