സ്റ്റൈലിഷ് ലുക്കിലൂടെ യുവാക്കളെ പോലും പിന്നിലാക്കാറുണ്ട് നടൻ മമ്മൂട്ടി. ഇപ്പോഴിതാ പതിവു പോലെ വീണ്ടും സോഷ്യൽ മീഡിയ കത്തിക്കാൻ മമ്മൂട്ടിയുടെ ചിത്രം വന്നിരിക്കുകയാണ്. നിർമാതാവ് ആന്റോ ജോസഫ് ആണ് മമ്മൂട്ടിയുടെ പുതിയ ഫോട്ടോ പങ്കുവച്ചിരിക്കുന്നത്. തന്റെ ഇൻസ്റ്റഗ്രാം പേജിലൂടെയാണ് ആന്റോ ജോസഫ് ഈ ചിത്രം പങ്കുവെച്ചിരിക്കുന്നത്.

'വാട്ട് നെക്സ്റ്റ്...?' എന്നാണ് മമ്മൂട്ടിയുടെ സ്റ്റൈലിഷ് ചിത്രത്തിനൊപ്പം ആന്റോ ജോസഫ് കുറിച്ചിരിക്കുന്നത്. തിങ്കളാഴ്ചയാണ് മമ്മൂട്ടിയുടെ 75-ാം പിറന്നാൾ. അതിന് തൊട്ടുമുൻപേയാണ് ഈ ചിത്രം പുറത്തുവന്നിരിക്കുന്നത് എന്നതാണ് ശ്രദ്ധേയം. പോസ്റ്റ് ചെയ്ത് നിമിഷങ്ങൾക്കുള്ളിൽത്തന്നെ ചിത്രം ആരാധകർ ഏറ്റെടുത്തുകഴിഞ്ഞിരിക്കുകയാണ്.

ഓറഞ്ച് നിറത്തിലെ ഷർട്ടും ഷൂസും ധരിച്ചാണ് മമ്മൂട്ടിയെ കാണാനാവുക. സംവിധായകൻ ജി മാർത്താണ്ഡൻ ഉൾപ്പെടെ നിരവധി പേരാണ് ഫോട്ടോയ്ക്ക് പ്രതികരണങ്ങളുമായെത്തിയിരിക്കുന്നത്. രണ്ട് ചിത്രങ്ങളുടെ അപ്ഡേറ്റുകളാണ് ഈ ജന്മദിനത്തിൽ മമ്മൂട്ടിയുടേതായി ആരാധകർ കാത്തിരിക്കുന്നത്.

രാജ് കുമാർ പെരിയസാമി സംവിധാനം ചെയ്യുന്ന 'ഓം' എന്ന തമിഴ്ചിത്രം, നിതീഷ് സഹദേവ് ഒരുക്കുന്ന ആക്ഷൻ ചിത്രം എന്നിവയാണവ. ഇതിൽ നിതീഷ് സഹദേവ് ഒരുക്കുന്ന ചിത്രത്തിന്റെ ടൈറ്റിലും ഫസ്റ്റ്ലുക്കും തിങ്കളാഴ്ച പുലർച്ചെ 12.01-ന് പുറത്തിറങ്ങും. നിർമാതാക്കളായ മമ്മൂട്ടി കമ്പനിയാണ് ഇക്കാര്യം പങ്കുവച്ചിരിക്കുന്നത്.