ഇടവേളയ്ക്ക് ശേഷമൊരു മമ്മൂട്ടി ചിത്രം ബോക്സ് ഓഫീസിലെത്തുകയാണ്. ആരാധകര് കാത്തിരിക്കുന്ന കളങ്കാവല് ഡിസംബര് അഞ്ചിന് തിയേറ്ററുകളിലെത്തും. റിലീസിന് മുമ്പ് തന്നെ കളങ്കാവലിന്റെ കഥയും മമ്മൂട്ടിയുടെ കഥാപാത്രവുമൊക്കെ ചര്ച്ചകളില് നിറയുകയാണ്. കുപ്രസിദ്ധ സീരിയല് കില്ലര് സയനൈ്ഡ് മോഹന്റെ കഥയാണ് ചിത്രം അവതരിപ്പിക്കുന്നതെന്ന് ചില റിപ്പോര്ട്ടുകളുണ്ടായിരുന്നു. ആരാധകരുടെ ഈ സംശയത്തിന് മമ്മൂട്ടി തന്നെ മറുപടി നല്കിയിരിക്കുകയാണ്.
സിനിമയുടെ പ്രൊമോഷന്റെ ഭാഗമായി മമ്മൂട്ടി കമ്പനി യൂട്യൂബ് ചാനല് പങ്കുവച്ച അഭിമുഖത്തിലാണ് മമ്മൂട്ടി തന്റെ കഥാപാത്രത്തെക്കുറിച്ച് സംസാരിച്ചത്. സയനൈഡ് മോഹന്റെ കഥയാണോ കളങ്കാവല് എന്ന അവതാരകയുടെ ചോദ്യത്തിനാണ് മമ്മൂട്ടി മറുപടി നല്കുന്നത്.
''സയനൈഡ് മോഹന്റെ കേസുമായി ബന്ധമൊന്നുമില്ല. സയനൈഡ് ഉപയോഗിക്കുന്നുവെന്ന് മാത്രം. ആ കഥ അല്ല ഇത്. ചിലപ്പോള് അതുപോലെ ഒരാളായിരിക്കാം. അതുപോലെയുള്ള കുറേയാളുകളെ പിടിച്ചിട്ടുണ്ട്. കുറേയൊക്കെ റിയലും കുറേയൊക്കെ ഭാവനയുമാണ്. അങ്ങനെയാണല്ലോ സിനിമ. എന്തെങ്കിലും ഇന്സ്പിരേഷനുണ്ടായിട്ടുണ്ടാകും എഴുത്തുകാരനും സംവിധായകനും'' എന്നാണ് മമ്മൂട്ടി പറയുന്നത്.
ചിത്രത്തില് പ്രധാന വേഷത്തിലെത്തുന്നത് വിനായകന് ആണ്. വിനായകനെ ചിത്രത്തിലേക്ക് നിര്ദ്ദേശിക്കുന്നത് മമ്മൂട്ടി തന്നെയാണ്. അതേക്കുറിച്ചും താരം പറയുന്നുണ്ട്. ''വിനായകന് ഒരു മാറ്റമാണ്. വിനായകനും നമുക്കും ഇതൊരു മാറ്റമായിരിക്കും. വിനായകന് മുമ്പും പൊലീസായിട്ടുണ്ട്. പക്ഷെ ഇത് അതുപോലെയുള്ള ഒന്നല്ല'' എന്നാണ് താരം പറയുന്നത്. വിനായകന്റെ വളര്ച്ചയെ താന് അത്ഭുതത്തോടെയാണ് കാണുന്നതെന്നും മമ്മൂട്ടി പറയുന്നു.
''അത്ഭുതത്തോടെ തന്നെയാണ് നോക്കിക്കാണുന്നത്. കഠിനാധ്വാനം കൊണ്ടും സത്യസന്ധത കൊണ്ടും ആത്മാര്ത്ഥ കൊണ്ടും തന്നെയാണ് ഒരു നടന് വിജയിക്കാന് സാധിക്കുകയുള്ളൂ. നമുക്ക് വേണ്ടി അഭിനയിക്കാന് വേറാരും വരില്ല. അപ്പോള് നമ്മള് സത്യസന്ധമായിരിക്കണം, അര്പ്പണബോധമുള്ളവരായിരിക്കണം, സിമ്പിളായിരിക്കണം, പലപ്പോഴും എനിക്കില്ലാത്ത ക്വാളിറ്റിയാണത്, ഇതെക്കെ വിനായകനുണ്ട്. നടന് എന്ന നിലയില് അദ്ദേഹം വളരെ ഡിസിപ്ലിന്ഡ് ആണ്. ഏതൊരു നടനാണെങ്കിലും ദീര്ഘകാലം നിലനില്ക്കണമെങ്കില് നന്നായി അഭിനയിച്ചേ തീരൂ. അയാള് കണ്വിന്സിങ് ആയിരിക്കണം. അത് തന്നെയാണ് വിനായകന്റെ ഏറ്റവും വലിയ വിജയവും. ഇപ്പോള് എത്തി നില്ക്കുന്ന സ്ഥലത്തെത്തിയതിന്റെ പിന്നിലെ രഹസ്യവും'' മമ്മൂട്ടി പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates