പിറന്നാൾ ദിനത്തിൽ പുതിയ ചിത്രം പ്രഖ്യാപിച്ച് മഞ്ജു വാര്യർ. ആയിഷ എന്ന ചിത്രത്തിന്റെ പോസ്റ്ററാണ് താരം പുറത്തുവിട്ടത്. ആദ്യത്തെ മലയാള-അറബിക് ചിത്രം എന്ന പ്രത്യേകതയോടെ പുറത്തെത്തുന്ന ആയിഷ സംവിധാനം ചെയ്യുന്നത് നവാഗതനായ ആമിർ പള്ളിക്കൽ ആണ്. 

ആയിഷയെ നിങ്ങള്‍ക്ക് മുന്‍പില്‍ അവതരിപ്പിക്കുന്നു. മലയാളം- അറബി ഭാഷയില്‍ ഇറങ്ങുന്ന ആദ്യത്തെ കൊമേഷ്യല്‍ ചിത്രമായിരിക്കും ഇത്. ആമിറിനും സക്കറിയയ്ക്കുമൊപ്പമുള്ള മനോഹരമായ യാത്രയ്ക്കായി കാത്തിരിക്കുന്നു- ചിത്രത്തിന്റെ പോസ്റ്റര്‍ പങ്കുവെച്ച് മഞ്ജു കുറിച്ചു.

സംവിധായകൻ സക്കറിയയാണ് ചിത്രം നിർമിക്കുന്നത്. രചന ആഷിഫ് കക്കോടി. ഇന്തോ-അറബിക് പശ്ചാത്തലത്തിലൊരുങ്ങുന്ന, ഈ കുടുംബ ചിത്രം പൂർണമായും ഗൾഫിലാണ്  ചിത്രീകരിക്കുന്നത്. മലയാളത്തിനും അറബിക്കും പുറമെ ഇംഗ്ലിഷിലും ഏതാനും ഇതര ഇന്ത്യൻ ഭാഷകളിലും ചിത്രം റിലീസ് ചെയ്യും. സംഗീതം എം. ജയചന്ദ്രൻ, സഹ നിർമാണം-ഷംസുദ്ധീൻ എം.ടി.,  ഹാരിസ് ദേശം, പി.ബി അനീഷ്, സക്കറിയ വാവാട്. ഛായാഗ്രഹണം  വിഷ്ണു ശർമ നിർവഹിക്കുന്നു.  എഡിറ്റർ-അപ്പു എൻ. ഭട്ടതിരി, ജനുവരിയിൽ സിനിമയുടെ ചിത്രീകരണം ആരംഭിക്കും.