ബോളി‌വുഡ് നടൻ മനോജ് ബാജ്പയീക്ക് കോവിഡ് സ്ഥിരീകരിച്ചു. കനു ബെഹ്ൽ സംവിധാനം ചെയ്യുന്ന ഡെസ്പാറ്റ്ച് എന്ന ചിത്രത്തിൽ അഭിനയിച്ചുകൊണ്ടിരിക്കുന്നതിനിടെയാണ് താരത്തിന് പോസിറ്റീവായത്. ഇപ്പോൾ വീട്ടിൽ ക്വാറന്റീനിലാണ് താരമെന്ന് അദ്ദേഹത്തിന്റെ വക്താവ് വ്യക്തമാക്കി. 

കഴിഞ്ഞ മാസം ചിത്രത്തിന്റെ ഷൂട്ടിങ് പുരോ​ഗമിക്കുന്നതിന് ഇടയിലാണ് സംവിധായകന് രോ​ഗം സ്ഥിരീകരിക്കുന്നത്. അതിന് പിന്നാലെയാണ് താരവും രോ​ഗബാധിതനാകുന്നത്. മനോജ് ചികിത്സയിലാണെന്നും ആരോ​ഗ്യത്തിൽ പുരോ​ഗതിയുണ്ടെന്നും പത്രക്കുറിപ്പിലൂടെ വക്താവ് അറിയിച്ചു. വീട്ടിൽ കഴിയുന്ന താരം എല്ലാം മുൻകരുതലുകളും സ്വീകരിക്കുന്നുണ്ടെന്നും വ്യക്തമാക്കി. 

സംവിധായകനും നായകനും കോവിഡ് പോസിറ്റീവായതോടെ ചിത്രത്തിന്റെ ഷൂട്ടിങ് മാറ്റിവച്ചു. ഇൻവെസ്റ്റി​ഗേഷൻ ത്രില്ലറാണ് ഡേസ്പാറ്റ്ച്. ബോളിവുഡിൽ രോ​ഗബാധിതരാവുന്നവരുടെ എണ്ണം വർധിക്കുകയാണ് കഴിഞ്ഞ ദിവസം സംവിധായകൻ സഞ്ജയ് ലീല ബൻസാലി, നടൻ രൺബീർ കപൂർ എന്നിവർക്ക് കോവിഡ് പോസിറ്റീവായിരുന്നു.