കവിയും സിനിമ ഗാനരചയിതാവുമായ മുരുകൻ കാട്ടാക്കടയുടെ ഓണ കവിത ആൽബമായി പുറത്തിറങ്ങി. യുവഗായിക അഭിനന്ദ എം കുമാറിന്റെ സ്വരമാധുരിയിലാണ് ​വിഡിയോ. ഈ വര്‍ഷം കരുതലിന്റെ ഭാഗമായി വീടുകളില്‍ ഓണം ആഘോഷിയ്ക്കുന്നവര്‍ക്കു വേണ്ടിയാണ് മുരുകന്‍ കാട്ടാക്കട - അഭിനന്ദ ടീമിന്റെ വീഡിയോ ഗാനം ഓര്‍മ്മയില്‍ ഒരോണം എന്ന പേരില്‍ അവതാര്‍ എന്റര്‍ടൈന്‍മെന്റ് പുറത്തിറക്കിയത്. 

മുരുകൻ കാട്ടാക്കടയുടെ സന്ദേശത്തിനൊപ്പമാണ് വിഡിയോ തുടങ്ങുന്നത്. ഓണം കവിതയുടെ എഡിറ്റഡ് വെര്‍ഷനാണ് അഭിനന്ദയുടെ ശബ്ദത്തിൽ പുറത്തുവന്നത്. ശിവന്‍ ഭാവനയാണ് ​സം​ഗീതം നൽകിയത്. അജയ് തിലകാണ് പശ്ചാത്തല സംഗീതം. 

തിരുവനന്തപുരം വിമന്‍സ് കോളേജിലെ വിദ്യാര്‍ത്ഥിനിയായ അഭിനന്ദ എം കുമാര്‍ ഈ വര്‍ഷത്തെ ബി.എ മ്യൂസിക് അവസാന വര്‍ഷത്തെ പരീക്ഷയില്‍ കേരള യൂണിവേഴ്‌സിറ്റിതലത്തില്‍ പോയിന്റ് നിലയില്‍ രണ്ടാം സ്ഥാനം കരസ്ഥമാക്കി . യൂണിവേഴ്‌സിറ്റിയുടെ ഔദ്യോഗിക റാങ്ക് പ്രഖ്യാപനം കാത്തിരിയ്ക്കുകയാണ് അഭിനന്ദ. പ്രശസ്ത സംഗീതജ്ഞന്‍ പണ്ഡിറ്റ് രമേശ് നാരായണന്റെ കീഴില്‍ എഴു വര്‍ഷമായി ഹിന്ദുസ്ഥാനി സംഗീതം അഭ്യസിയ്ക്കുന്നു. പ്രൊഫ.ഓമനക്കുട്ടിയമ്മയുടെ കീഴില്‍ അഞ്ചുവര്‍ഷം കര്‍ണ്ണാടിക് സംഗീതവും അഭ്യസിച്ചു.