ദൃശ്യം 2നു ശേഷം പൃഥ്വിരാജ് സംവിധാനം ചെയ്യുന്ന ബ്രോ ഡാഡിയിലൂടെ വീണ്ടും ഒന്നിക്കുകയാണ് സൂപ്പർതാര ജോഡികളായ മോഹൻലാലും മീനയും. ഹൈദരാബാദിലാണ് ചിത്രത്തിന്റെ ഷൂട്ടിങ് പുരോ​ഗമിക്കുന്നത്. ഷൂട്ടിങ്ങിന്റെ ഇടവേളയിൽ സുഹൃത്തിനെ കാണാൻ എത്തിയ മോഹൻലാലിന്റേയും മീനയുടേയും ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറലാവുന്നത്. തെന്നിന്ത്യൻ താരം മോഹൻ ബാബുവിന്റെ വീട്ടിലാണ് ഇരുവരും അതിഥികളായി എത്തിയത്. 

മോഹന്‍ ബാബുവിനൊപ്പം ഭാര്യ നിര്‍മ്മലയും മക്കളായ ലക്ഷ്‍മി മഞ്ചുവും വിഷ്‍ണു മഞ്ചുവും വിഷ്‍ണുവിന്‍റെ ഭാര്യ വിറാനിക്കയും ചേർന്നാണ് ഇരുവരേയും വരവേറ്റത്. അത്താഴം കഴിച്ച്, ഏറെ നേരം വസതിയില്‍ ചിലവഴിച്ചാണ് മോഹൻലാലും മീനയും മടങ്ങിയത്. മോഹന്‍ലാലിന്‍റെ സുഹൃത്ത് സമീര്‍ ഹംസയും ഇവർക്കൊപ്പമുണ്ടായിരുന്നു. 

വെള്ള ജുബ്ബയും മുണ്ടും ധരിച്ച് കേരളീയ വേഷത്തിലായിരുന്നു മോഹൻലാൽ. എം ഫാമിലി എന്ന അടിക്കുറിപ്പിലാണ് മോഹൻലാലിനും മോഹൻബാബുവിനുമാപ്പമുള്ള ചിത്രം മീന പങ്കുവെച്ചത്. കൂടാതെ ലക്ഷ്‍മി മഞ്ചുവും ചിത്രങ്ങൾ പോസ്റ്റ് ചെയ്തിട്ടുണ്ട്. സൂര്യ നായകനായി എത്തിയ സൂരരൈ പോട്ര് സിനിമയിൽ എയർഫോർസ് ഉദ്യോഗസ്ഥനായ ഭക്തവൽസലം നായിഡുവായി എത്തിയത് മോഹൻബാബുവാണ്.