കൂലിയിലെ സൈമൺ എന്ന കഥാപാത്രത്തിലൂടെ തമിഴകത്തും തരം​ഗം സൃഷ്ടിച്ചിരിക്കുകയാണ് നടൻ നാ​ഗാർജുന അക്കിനേനി. വൻ സ്വീകാര്യതയാണ് ഈ കഥാപാത്രത്തിന് ലഭിച്ചതും. നാഗാർജുനയുടെ കരിയറിലെ നൂറാമത്തെ ചിത്രത്തെക്കുറിച്ച് അഭ്യൂഹങ്ങൾ പ്രചരിക്കാൻ തുടങ്ങിയിട്ട് നാളുകളേറെയായി. ഇപ്പോഴിതാ അഭ്യൂഹങ്ങൾക്കെല്ലാം വിരാമമിട്ട് തന്റെ 100-ാമത്തെ ചിത്രത്തെക്കുറിച്ച് വെളിപ്പെടുത്തിയിരിക്കുകയാണ് നാ​ഗാർജുന.

നടൻ ജ​ഗപതി ബാബുവിന്റെ ജയമ്മു നിശ്ചയമ്മുരാ വിത്ത് ജഗപതി എന്ന ടോക്ക് ഷോയിൽ പങ്കെടുക്കവേയാണ് നാ​ഗാർജുന തന്റെ പുതിയ പ്രൊജക്ടിനെക്കുറിച്ച് പങ്കുവച്ചത്. തമിഴ് ഫിലിംമേക്കറായ ആർ കാർത്തിക്കിനൊപ്പമാണ് നാ​ഗാർജുനയുടെ പുതിയ പ്രൊജക്ട്. കിങ് 100 എന്നാണ് ചിത്രത്തിന് താല്ക്കാലികമായി പേരിട്ടിരിക്കുന്നത്.

"എന്റെ അടുത്ത പ്രൊജക്ട് കിങ് 100 ആണ്. കഴിഞ്ഞ 6-7 മാസമായി ഞങ്ങൾ ഇതിന്റെ പണിപ്പുരയിലാണ്. ഒരു വർഷം മുൻപ് തമിഴ് സംവിധായകനായ കാർത്തിക് എന്റെ അടുത്ത് വന്ന് കഥ പറഞ്ഞിരുന്നു. ഇതൊരു വലിയ ചിത്രമാണ്. ആക്ഷൻ പാക്കഡ് ഫാമിലി ഡ്രാമയായിട്ടാണ് ചിത്രമെത്തുക. ഇത്തവണ, സിനിമയിലെ നായകൻ ഞാൻ തന്നെയാണ്".- തന്റെ സമീപകാല പ്രതിനായക വേഷങ്ങളെക്കുറിച്ച് തമാശയായി പറഞ്ഞുകൊണ്ട് അദ്ദേഹം കൂട്ടിച്ചേർത്തു.

അടുത്തിടെ റിലീസ് ചെയ്ത കൂലി, കുബേര എന്നീ ചിത്രങ്ങളിൽ നെ​ഗറ്റീവ് ഷെയ്ഡുള്ള കഥാപാത്രങ്ങളായാണ് നാ​ഗാർജുന എത്തിയത്. അശോക് സെൽവനെ നായകനാക്കിയൊരുക്കിയ നിതം ഒരു വാനം എന്ന ചിത്രത്തിന്റെ സംവിധായകനാണ് കാർത്തിക്.

അതേസമയം നാ​ഗാർജുനയുടെ ഈ വെളിപ്പെടുത്തൽ തെല്ലൊന്നുമല്ല ആരാധകരെ ആവേശത്തിലാഴ്ത്തിയിരിക്കുന്നത്. സമീപകാലത്ത് നാ​ഗാർജുന ചെയ്ത വേഷങ്ങളെല്ലാം ഒന്നിനൊന്ന് മികച്ചതായിരുന്നുവെന്നും അതുകൊണ്ട് തന്നെ കിങ് 100 നായി കാത്തിരിക്കുന്നുവെന്നുമാണ് സോഷ്യൽ മീഡിയയിൽ നിറയുന്ന കമന്റുകൾ.