കാത്തിരിപ്പിനൊടുവിൽ ബാലയ്യ ചിത്രം അഖണ്ഡ 2 തിയറ്ററുകളിലെത്തിയിരിക്കുകയാണ്. റിലീസിന് മുൻപ് തന്നെ ചിത്രം ഏറെ ട്രോളുകൾ ഏറ്റുവാങ്ങിയിരുന്നു. ഇപ്പോഴിതാ ചിത്രത്തിന്റെ ആദ്യ പ്രതികരണങ്ങൾ പുറത്തുവന്നിരിക്കുകയാണ്. സമ്മിശ്ര പ്രതികരണമാണ് ചിത്രത്തിന് ലഭിച്ചു കൊണ്ടിരിക്കുന്നത്. മൂന്ന് മണിക്കൂർ നേരത്തെ ടോർച്ചർ സഹിക്കാൻ പറ്റില്ല എന്നാണ് ഭൂരിഭാ​ഗം പേരും കുറിച്ചിരിക്കുന്നത്.

അഖണ്ഡ 2 മൂന്ന് മണിക്കൂർ നീണ്ടുനിൽക്കുന്ന ടോർച്ചർ! മസ്തിഷ്ക മരണം സംഭവിച്ച പോലെയുള്ള എഴുത്ത്, ക്രിഞ്ച് ഡയലോ​ഗുകൾ, ദിശാബോധമില്ലാത്ത തിരക്കഥ, നിലാവാരമില്ലാത്ത വിഎഫ്എക്സ്, സീറോ ലോജിക്. തമന്റെ ബിജിഎം മാത്രമാണ് "ഏക ആശ്വാസം". മൊത്തത്തിൽ ദുരന്തം!- എന്നാണ് ഒരാൾ എക്സിൽ കുറിച്ചിരിക്കുന്നത്.

ലോജിക് എന്നത് തൊട്ടുതീണ്ടിയിട്ടില്ലാത്ത ചിത്രത്തിലെ പല രംഗങ്ങളും ഇതിനോടകം വൈറലായിക്കഴിഞ്ഞു. വില്ലന്മാരുടെ ഗ്യാങ് അയക്കുന്ന റോബോട്ടുകളെ വരെ ബാലയ്യ ഇടിച്ചിടുന്നുണ്ട്. റോബോട്ടുകളുടെ ഇലക്ട്രിക് ഷോക്കൊന്നും തനിക്ക് പ്രശ്‌നമല്ലെന്ന രീതിയിലാണ് താരത്തിന്റെ ഫൈറ്റ് സീക്വന്‍സുകള്‍. റോബോട്ടുകളെ വരെ ഇടിച്ച് പപ്പടമാക്കുന്ന നായകന് മനുഷ്യരൊന്നും വലിയ എതിരാളി പോലുമല്ലെന്നും തെളിയിക്കുന്നുണ്ട്.

വില്ലനെ ഗദ കൊണ്ടടിച്ച ശേഷം ഹാര്‍ട്ട് ബീറ്റ് പരിശോധിക്കുന്ന രംഗമെല്ലാം ഇതിനോടകം വൈറലായി കഴിഞ്ഞു. ഇത്രയും സൂപ്പര്‍ പവര്‍ കൈയിലുള്ള നായകനെ മാര്‍വെലോ ഡിസിയോ ഏറ്റെടുക്കണമെന്നും ചിലര്‍ ആവശ്യപ്പെടുന്നുണ്ട്. ഒടിടി റിലീസിന് ശേഷം ഒരു ലോഡ് ട്രോളിനുള്ള വക അഖണ്ഡ 2 വിലുണ്ടെന്നാണ് കണക്കുക്കൂട്ടല്‍.

വില്ലന്മാരെ ഇടിച്ച് പറപ്പിക്കുന്നതിനൊപ്പം ഹൈന്ദവ സംസ്‌കാരത്തെക്കുറിച്ച് നായകന്റെ വക അടിക്കടി ക്ലാസുകളും ഈ സിനിമയിലുണ്ട്. ആദ്യ ഭാഗത്തെക്കാള്‍ ഡോസ് കൂടിയ ഉപദേശമാണെന്ന് പലരും അഭിപ്രായപ്പെടുന്നുണ്ട്. തമന്റെ ബാക്ക്​ഗ്രൗണ്ട് സ്കോർ കൂടി ഇല്ലായിരുന്നെങ്കിൽ തിയറ്ററിൽ നിന്ന് ഇറങ്ങിയോടിയേനെ എന്നും ചിലർ പറയുന്നുണ്ട്.