അയ്യപ്പനും കോശിയും എന്ന ചിത്രത്തിലൂടെയാണ് നഞ്ചമ്മ എന്ന ​ഗായിക മലയാളികളുടെ മനസു കവരുന്നത്. ചിത്രത്തിലെ ​ഗാനങ്ങളെല്ലാം സൂപ്പർഹിറ്റുകൾ ആയിരുന്നു. ഇപ്പോഴിതാ  വ്യത്യസ്തമായ മറ്റൊരു ​ഗാനവുമായി എത്തുകയാണ് നഞ്ചമ്മ. ഇന്ദ്രൻസ് പ്രധാന വേഷത്തിലെത്തുന്ന സ്റ്റേഷൻ 5 എന്ന ചിത്രത്തിലേതാണ് ​ഗാനം. കേലെ കേലെ കുംബ എന്നു തുടങ്ങുന്ന ​ഗാനം നഞ്ചമ്മയ്ക്കൊപ്പം നടൻ വിനോദ് കോവൂരാണ് പാടിയിരിക്കുന്നത്.

ശ്രദ്ധ നേടി വിഡിയോ

പാട്ടിന്റെ വിഡിയോ സംഗീത സംവിധായകൻ എം. ജയചന്ദ്രൻ പുറത്തിറക്കി. പ്രകാശ് മാരാർ രചിച്ച ഗാനത്തിന് സംഗീതം നൽകിയിരിക്കുന്നത് സംവിധായകൻ പ്രശാന്ത് കാനത്തൂർ തന്നെയാണ്. ​ഗാനം പുറത്തുവന്നതിന് പിന്നാലെ മികച്ച അഭിപ്രായമാണ് പ്രേക്ഷകരിൽ നിന്ന് ലഭിക്കുന്നത്. 

ചേവംബായി ആയി ഇന്ദ്രൻസ്

ചേവംബായി എന്ന കേന്ദ്ര കഥാപാത്രത്തെയാണ് ഇന്ദ്രൻസ് അവതരിപ്പിക്കുന്നത്. മാപ് ഫിലിം ഫാക്ടറിയുടെ ബാനറില്‍ ബിഎ മായ നിർമ്മിച്ച ' സ്‌റ്റേഷന്‍ 5' ജനുവരി 7- ന് തിയറ്ററുകളിൽ റിലീസ് ചെയ്യും. പ്രധാന കഥാപാത്രത്തെ അവതരിപ്പിക്കുന്നത് പ്രയാണാണ്. ' തൊട്ടപ്പന്‍ ' ഫെയിം പ്രിയംവദ കൃഷ്ണനാണ് നായിക. ഡയാന ഹമീദും ശക്തമായ കഥാപാത്രമായി എത്തുന്നു. പ്രതാപ് നായരാണ് ചിത്രത്തിൻ്റെ രചയിതാവും ഛായാഗ്രാഹകനും.