സംവിധായകൻ ആർ കെ സെൽവമണി ഒരുക്കുന്ന വെബ് സീരിസാണ് കുട്രം പുരിന്ദവൻ. പശുപതിയാണ് സീരിസിൽ പ്രധാന വേഷത്തിലെത്തുന്നത്. ലക്ഷ്മി പ്രിയ ചന്ദ്രമൗലി ആണ് സീരിസിൽ മറ്റൊരു പ്രധാന വേഷത്തിലെത്തുന്നത്. ത്രില്ലർ ഴോണറിലാണ് സീരിസ് ഒരുക്കിയിരിക്കുന്നത്.

ഇപ്പോഴിതാ സീരിസിന്റെ ഒടിടി റിലീസ് തീയതി പ്രഖ്യാപിച്ചിരിക്കുകയാണ്. ഡിസംബർ അഞ്ചിന് സോണി ലിവിലൂടെയാണ് സീരിസ് സ്ട്രീമിങ്ങിനെത്തുക. തമിഴ്, മലയാളം, കന്നഡ, ഹിന്ദി, തെലുങ്ക് ഭാഷകളിൽ ചിത്രം പ്രേക്ഷകർക്ക് കാണാനാകും.

ലിസി ആന്റണി, മൂന്നാർ രമേശ്, അജിത് കോശി എന്നിവരും ചിത്രത്തിൽ പ്രധാന വേഷങ്ങളിലെത്തിയിരുന്നു. ഹാപ്പി യൂണികോൺ/അക്ബുൾസ് ആണ് സീരിസ് നിർമിക്കുന്നത്. പുലൻ വിസാരണൈ, ക്യാപ്റ്റൻ പ്രഭാകരൻ, മക്കൾ ആച്ചി, ചെമ്പരുത്തി, അരസിയൽ തുടങ്ങിയ നിരവധി സിനിമകളിലൂടെ പ്രശസ്തനാണ് ആർ കെ സെൽവമണി.

അതേസമയം ബൈസൺ ആണ് പശുപതിയുടേതായി ഒടുവിൽ തിയറ്ററുകളിലെത്തിയ ചിത്രം. വേലുസാമി എന്ന കഥാപാത്രമായാണ് ചിത്രത്തിൽ പശുപതിയെത്തിയത്. നടന്റെ പെർഫോമൻസിന് വൻ പ്രേക്ഷക സ്വീകാര്യതയും ലഭിച്ചിരുന്നു.