തെന്നിന്ത്യൻ സിനിമയുടെ തലവര തന്നെ മാറ്റിയെഴുതിയ ചിത്രമാണ് ബാഹുബലി. എല്ലാ ബോക്സോഫീസ് റെക്കോർഡുകളെയും കാറ്റിൽ പറത്തിയായിരുന്നു ചിത്രത്തിന്റെ തേരോട്ടം. ഇന്നിപ്പോൾ ബാഹുബലി ആദ്യ ഭാ​ഗവും രണ്ടാം ഭാ​ഗവും ചേർത്തു കൊണ്ട് ചിത്രം റീ റിലീസായി തിയറ്ററുകളിലെത്തിയിരിക്കുകയാണ്.

റീ റിലീസിനും വൻ സ്വീകാര്യതയാണ് തിയറ്ററുകളിൽ നിന്ന് ലഭിക്കുന്നത്. എല്ലാ ഭാഷയിലും റെക്കോർഡ് വിജയമാണ് ബാഹുബലി സ്വന്തമാക്കിയത്. ബാഹുബലി ദ് എപ്പിക് എന്ന പേരിൽ രണ്ടു ഭാഗങ്ങളായി പുറത്തിറങ്ങിയ ബാഹുബലി സീരിസിനെ ഇത്തവണ ഒറ്റ സിനിമയായി 4K ദൃശ്യമികവിൽ ആണ് റീ റിലീസ് ചെയ്തിരിക്കുന്നത്.

ബാഹുബലി റീ റിലീസിന് പിന്നാലെ തിയറ്ററുകളിൽ നിന്നുള്ള ദൃശ്യങ്ങളും വൈറലാവുകയാണ്. അതോ‌ടൊപ്പം റീ റിലീസിനെത്തിയപ്പോൾ ചിത്രത്തിന്റെ സൗണ്ട് ക്വാളിറ്റിക്കാണ് കയ്യടി ലഭിക്കുന്നത്. ഇന്ത്യൻ സിനിമയിലെ തന്നെ ഏറ്റവും വലിയ വിഷ്വൽ എപ്പിക് ആണിതെന്നും ചിലർ എക്സിൽ കുറിക്കുന്നു. അതേസമയം ചിത്രം ഇന്ത്യയിൽ നിന്ന് റീ റിലീസിലും 100 കോടി നേടുമെന്നാണ് ട്രേഡ് അനലിസ്റ്റുകളുടെ കണക്കുകൂട്ടൽ.

റിലീസ് സമയത്ത് ലോകമെമ്പാടും ഏറ്റവും കൂടുതൽ കളക്ഷൻ നേടിയ രണ്ടാമത്തെ ഇന്ത്യൻ ചിത്രമായി ബാഹുബലി മാറിയിരുന്നു. ബാഹുബലി: ദ് ബിഗിനിങ് ബോക്സ്ഓഫീസിൽ ₹650 കോടി രൂപ നേടിയിരുന്നു.

2017 ൽ പുറത്തിറങ്ങിയ ബാഹുബലിയുടെ രണ്ടാം ഭാഗം 562 കോടിയാണ് ബോക്സോഫീസിൽ നിന്ന് നേടിയത്. ബാഹുബലിയുടെ കഥ എഴുതിയത് രാജമൗലിയുടെ പിതാവ് വി വിജയേന്ദ്ര പ്രസാദ് ആണ്. ചിത്രത്തിന്‍റെ സംഗീത സംവിധായകന്‍ എം എം കീരവാണിയാണ്. ചിത്രത്തിലെ ഗാനങ്ങളും ബിജിഎമ്മും ഇന്നും ഹിറ്റാണ്.