സെലിബ്രിറ്റി നര്‍ത്തകരെ പരിഹസിക്കുന്നവര്‍ക്ക് മറുപടിയുമായി രചന നാരായണന്‍കുട്ടി. സെലിബ്രിറ്റി നര്‍ത്തകരോട് പലര്‍ക്കും പുച്ഛമാണ്. എന്നാല്‍ സ്വന്തം നൃത്ത വിദ്യാലത്തിന്റെ മാര്‍ക്കറ്റിങിന് അവരെ തന്നെ വിളിക്കുമെന്നും രചന പറയുന്നു. സോഷ്യല്‍ മീഡിയയില്‍ പങ്കുവച്ച കുറിപ്പിലൂടെയായിരുന്നു രചനയുടെ പ്രതികരണം. ആ വാക്കുകളിലേക്ക്:

'സെലിബ്രിറ്റി ഡാന്‍സേഴ്‌സി'നെ അങ്ങനെ ഒരു വിളിപ്പേരില്ലാത്ത ''പല'' ഡാന്‍സേഴ്‌സിനും പൊതുവേ പരമ പുച്ഛം ആണ്. അവര്‍ക്കു കിട്ടുന്ന കൂടുതല്‍ അവസരങ്ങളും കൂടുതല്‍ പ്രതിഫലവും ആണ് എല്ലാരുടേയും വിഷയം. എന്നാല്‍ ഈ ''പലര്‍ക്കും'' അവരുടെ നൃത്ത വിദ്യാലയത്തിന്റെ വാര്‍ഷിക ആഘോഷത്തിനു അതിഥി ആയും, പെര്‍ഫോമര്‍ ആയും ഈ ''കഴുവേറികള്‍/കഴിവേറികള്‍'' തന്നെ വേണം.. മാര്‍ക്കറ്റിങ് ആണ് ഉദ്ദേശം. എന്നാല്‍ ഏറ്റവും ചുരുങ്ങിയ ചിലവില്‍.

കുറിപ്പ് തികച്ചും വ്യക്തിപരം . ചെറുപ്പം മുതലേ എന്നെ അറിയുന്നവര്‍ക്ക് ഞാന്‍ ഒരു സെലിബ്രിറ്റി ഡാന്‍സര്‍ അല്ല. എന്നാല്‍ ഈ കഴുവേറി/കഴിവേറി, മറിമായം എന്ന സീരീസിലും 30 ഓളം ചലച്ചിത്രങ്ങളിലും അഭിനയിച്ചപ്പോള്‍ ''തന്റേതല്ലാത്ത കാരണങ്ങളാല്‍'' അങ്ങനെ ഒക്കെ ആയിപോയി. ആ സ്റ്റാറ്റസ് മുതലാക്കി, മാര്‍ക്കറ്റിങ് വിജയം ആയതിനു ശേഷം, മാറി നിന്നു പരസ്യമായും രഹസ്യമായും സെലിബ്രിറ്റി ഡാന്‍സേഴ്‌സിനെ കുറ്റപ്പെടുത്താന്‍ വ്യഗ്രത കൂട്ടുന്ന, ആ വിളിപ്പേര് ഇല്ലാത്ത ''പലര്‍ക്കും'' മൂക്കത്തു വിരല്‍ വച്ച്, എന്റെ ഉള്ളു നിറഞ്ഞ പുഞ്ചിരി.

എന്‍ബി: സെലിബ്രിറ്റി ആയും അല്ലാതേയും എന്നെ അതിഥി ആയും പെര്‍ഫോമര്‍ ആയും ''സ്‌നേഹത്തോടെ''(പ്രതിഫലം തന്നും ഒപ്പം തരാതേയും) ആര് ക്ഷണിച്ചാലും ഒഴിവുണ്ടെങ്കില്‍ ഞാന്‍ ഇനിയും പോകും. നാളെ തിരിഞ്ഞു നിന്നും, മുന്നില്‍ നിന്നും എന്നെ കുറ്റം പറയും എന്ന കഴിവേറിയ ബോധത്തോടെ തന്നെ.