സൂപ്പർതാരം രജനീകാന്ത് നായകനായി എത്തിയ ചിത്രം ബാബ വീണ്ടും തിയറ്ററുകളിലേക്ക് എത്തുകയാണ്. റീമാസ്റ്ററിങ് നടത്തിയാണ് ചിത്രം റീ റിലാസ് ചെയ്യുക. ശബ്ദത്തിലും വിഷ്വലിലും കൂടുതൽ ക്വാളിറ്റിയോടെ എത്തുന്ന ബാബയെ കാണാനായി പ്രതീക്ഷയോടെയാണ് ആരാധകർ കാത്തിരിക്കുന്നത്. ഇപ്പോൾ ആരാധകരെ ആവേശത്തിലാക്കിക്കൊണ്ട് ചിത്രത്തിന്റെ റീമാസ്റ്ററിങ് ട്രെയിലർ പുറത്തെത്തിയിരിക്കുകയാണ്.

രണ്ട് മിനിറ്റ് ദൈർഘ്യമുള്ള ട്രെയിലറാണ് പുറത്തുവിട്ടത്. മികച്ച വരവേൽപ്പാണ് ട്രെയിലറിന് നൽകിയത്. ഇതിനോടകം 15 ലക്ഷം പേരാണ് ട്രെയിലർ കണ്ടത്. യൂട്യൂബിൽ ട്രെൻഡിങ്ങാകുകയാണ് വിഡിയോ. നടന്റെ മാസ് പെർഫോമൻസ് വീണ്ടും ബി​​ഗ് സ്ക്രീനിൽ കാണാനാകുന്നതിന്റെ ആവേശത്തിലാണ് ആരാധകർ. രജനീകാന്തിന്റെ പിറന്നാളിനോട് അനുബന്ധിച്ചാകും ചിത്രത്തിന്റെ റിലീസ്. 

2002 ല്‍ പുറത്തിറങ്ങിയ ചിത്രത്തിന്റെ സംവിധാനം നിർവഹിച്ചിരിക്കുന്നത് സുരേഷ് കൃഷ്ണയാണ്. വൻ വിജയം നേടിയ 'പടയപ്പ' യ്ക്കു ശേഷമാണ് ബാബ റിലീസിന് എത്തുന്നത്. ലോട്ടസ് ഇന്‍റര്‍നാഷണലിന്‍റെ ബാനറില്‍ രജനീകാന്ത് തന്നെയായിരുന്നു ചിത്രത്തിന്‍റെ നിര്‍മ്മാണം. രജനീകാന്ത് തന്നെയാണ് ചിത്രത്തിന്റെ കഥയും തിരക്കഥയും എഴുതിയത്. പടയപ്പയുടെ വിജയം പ്രതീക്ഷിച്ചെത്തിയ ചിത്രം ബോക്സ് ഓഫിസിൽ മുന്നേറ്റം കാഴ്ചവയ്ക്കാനായില്ല. ഛോട്ട കെ നായിഡു ആയിരുന്നു ഛായാഗ്രാഹകന്‍. എഡിറ്റിംഗ് വി ടി വിജയന്‍. സംഗീതം എ ആര്‍ റഹ്‍മാന്‍. നേരത്തെ രജനീകാന്തിന്റെ ബാഷയും ഡിജിറ്റല്‍ റീമാസ്റ്ററിം​ഗ് നടത്തി തിയറ്ററുകളില്‍ എത്തിയിരുന്നു. 

ഈ വാര്‍ത്ത കൂടി വായിക്കൂ 

ഒരു നടൻ എങ്ങനെ ആകരുതെന്ന് ഒരാൾ പഠിപ്പിച്ചു, നന്ദി കുരുവെ എന്ന് ജൂഡ് ആന്റണി; ആളെ തിരഞ്ഞ് സോഷ്യൽ മീഡിയ

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ