തെന്നിന്ത്യൻ താരദമ്പതികളായ നാ​ഗചൈതന്യയും സാമന്തയും വിവാഹമോചിതരാകുന്നു. ഇരുവരും ഇതുസംബന്ധിച്ച ഔദ്യോ​ഗിക അറിയിപ്പ് പുറത്തുവിട്ടു. ഏറെനാളായി ഇരുവരും പിരിയുകയാണെന്ന തരത്തിൽ വാർത്തകൾ പ്രചരിച്ചിരുന്നെങ്കിലും ഇപ്പോൾ താരങ്ങൾ തന്നെ ഇക്കാര്യം ആരാധകരെ അറിയിച്ചിരിക്കുകയാണ്. 

 നാ​ഗചൈതന്യയും സാമന്തയും സോഷ്യൽ മീഡിയ പേജുകളിൽ ഇതുസംബന്ധിച്ച കുറിപ്പ് പങ്കുവച്ചു. "ഒരുപാട് ആലോചിച്ചും ചിന്തിച്ചും ചായും ഞാനും ഭാര്യയും ഭർത്താവും എന്ന ബന്ധം അവസാനിപ്പിച്ച് ഞങ്ങളുടെ വഴി പിന്തുടരാൻ തീരുമാനിച്ചിരിക്കുകയാണ്. ഒരു പതിറ്റാണ്ടിലേറെ ഞങ്ങൾ സൗഹൃദത്തിലായിരുന്നു, ഞങ്ങളുടെ ബന്ധത്തിന്റെ അടിസ്ഥാനവും അതുതന്നെയായിരുന്നു, ആ സ്‌പെഷ്യൽ ബോണ്ട് തുടർന്നും ഉണ്ടാകുമെന്ന് ഞങ്ങൾ വിശ്വസിക്കുന്നു", സാമന്ത കുറിച്ചു. 

കഠിനമായ ഈ സമയത്ത് പിന്തുണ വേണമെന്നും സ്വകാര്യത മാനിക്കണമെന്നും താരങ്ങൾ അഭ്യർഥിക്കുന്നുണ്ട്.