മോഹൻലാൽ – സംഗീത് പ്രതാപ് കോംബോ വീണ്ടും സോഷ്യൽ മീഡിയയിൽ വൈറലാവുകയാണ്. അടുത്തിടെ സംവിധായകൻ സത്യൻ അന്തിക്കാട് ഒരു അഭിമുഖത്തിൽ ഇവരുടെ കോംബോയെ പഴയ മോഹൻലാൽ – ശ്രീനിവാസൻ അല്ലെങ്കിൽ ജഗതി കോംബോ പോലെ തോന്നുവെന്ന് പറഞ്ഞിരുന്നു. അതിന് പിന്നാലെയാണ് സം​ഗീത് മോഹൻ ലാലുമായുള്ള രസകരമായ കുറച്ച് ചിത്രങ്ങൽ സോഷ്യൽ മീഡിയയിൽ പങ്കുവെച്ചത്. അതാണിപ്പോൾ ആരാധകർ ഏറ്റെടുത്തിരിക്കുന്നത്. സത്യൻ അന്തിക്കാട് സംവിധാനം ചെയ്യുന്ന ‘ഹൃദയപൂർവം’ എന്ന ഏറ്റവും പുതിയ ചിത്രത്തിലാണ് ഇരുവരും ഒന്നിച്ചെത്തുന്നത്.

സംഗീതിനൊപ്പം ചിരിച്ചുകളിച്ച് നിൽക്കുന്ന മോഹൻലാലാണ് ചിത്രങ്ങളിൽ ഉള്ളത്. ‘ഇത് ഞാൻ കണ്ടുവളർന്ന ലെജൻഡ് തന്നെയാണോ അതോ വർഷങ്ങളായിട്ട് എനിക്കറിയാവുന്ന സുഹൃത്തോയെന്ന് ചിന്തിച്ചു പോയ പല നിമിഷങ്ങളുണ്ടായിട്ടുണ്ട്. എന്റെ ജീവിതത്തിലെ ഏറ്റവും നല്ല ഫോട്ടോസ് ആണിത്. എല്ലാ ആനന്ദ നിമിഷങ്ങൾക്കും ഒരുപാടു നന്ദി ലാലേട്ടാ’ എന്ന ക്യാപ്ഷനോട് കൂടിയാണ് സംഗീത് ചിത്രങ്ങൾ ഇൻസ്റ്റാഗ്രാമിൽ പങ്കുവെച്ചത്.

നിരവധി കമന്റുകളാണ് പോസ്റ്റിന് താഴെ വരുന്നത്. 'മലയാളികൾ ഒന്നടങ്കം ആ​ഗ്രഹിക്കുന്ന നിമിഷം','അസൂയ തോന്നുന്ന നിമിഷങ്ങൾ' എന്ന് ചിലർ കമന്റ് ചെയ്തു. മോഹൻലാലിൻറെ ഫേമസ് ‘എന്താ മോനെ’ ഡയലോഗ് മുതൽ ലാലേട്ടന്റെ മാസ്റ്റർ പീസ് ഡയലോ​ഗായ 'എടാ വിജയാ..എന്താടാ ദാസാ' എന്ന ഡയലോ​ഗുകൾ കൊണ്ടും കമന്റ്ബോക്സ് നിറഞ്ഞിരിക്കുകയാണ്. ‘പൂക്കീ’ ലാലേട്ടനെ കണ്ട സന്തോഷവും ആരാധകർ പങ്കുവയ്ക്കുന്നുണ്ട്

അതേസമയം, ‘ഹൃദയപൂർവം’ സിനിമയിൽ മോഹന്‍ലാലും സംഗീത് പ്രതാപും തമ്മിലുള്ള ഹ്യൂമർ നല്ല രീതിയിൽ വർക്കായിട്ടുണ്ടെന്ന് സത്യന്‍ അന്തിക്കാട് നേരത്തെ പറഞ്ഞിരുന്നു. ഓണത്തിന് എല്ലാവർക്കും ആസ്വദിക്കാൻ സാധിക്കുന്ന ഒരു ചിത്രമായിരിക്കും ഹൃദയപൂർവമെന്നും അദ്ദേഹം വ്യക്തമാക്കി. വർഷങ്ങൾക്ക് ശേഷം മോഹൻലാലും സത്യൻ അന്തിക്കാടും ഒന്നിക്കുന്ന ചിത്രം എന്ന പ്രത്യേകത കൂടി ഈ സിനിമയ്ക്കുണ്ട്. സത്യൻ അന്തിക്കാടിന്റെ മക്കളായ അഖിൽ സത്യനും അനൂപ് സത്യനും അദ്ദേഹത്തിനൊപ്പം ഈ ചിത്രത്തിൽ പ്രവർത്തിക്കുന്നുണ്ട്. അഖിൽ സത്യനാണ് കഥ ഒരുക്കിയിരിക്കുന്നത്.