രൺവീർ സിങ് നായകനാകുന്ന ഏറ്റവും പുതിയ ചിത്രമാണ് ദുരന്തർ. രൺവീറിന്റെ 40-ാം പിറന്നാളിനോടനുബന്ധിച്ച് ജൂലൈ ആറിന് ചിത്രത്തിന്റെ ഫസ്റ്റ് ലുക്കും പ്രേക്ഷകരിലേക്കെത്തിയിരുന്നു. വയലൻസ് മൂഡിലാണ് ഈ ആക്ഷൻ ചിത്രമൊരുങ്ങുന്നതെന്നാണ് ഫസ്റ്റ് ലുക്ക് നൽകുന്ന സൂചന. വൻ താരനിരയാണ് ചിത്രത്തിൽ രൺവീറിനൊപ്പം അണിനിരക്കുന്നതും.

സഞ്ജയ് ദത്ത്, ആർ മാധവൻ, അർജുൻ രാംപാൽ, അക്ഷയ് ഖന്ന എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. നടി സാറ അർജുൻ ആണ് ചിത്രത്തിൽ രൺവീറിന്റെ നായികയായെത്തുന്നത്. ദുരന്തർ ഫസ്റ്റ് ലുക്ക് വൈറലാകുന്നതിന് പിന്നാലെ ചിത്രത്തിനെതിരെ വിമർശനങ്ങളുമുയരുകയാണ്. നാല്പതുകാരനായ രൺവീറിന് ഇരുപതുകാരിയായ സാറ നായികയായതാണ് ആരാധകർക്കിടയിൽ ചർച്ചയായി മാറുന്നത്. സാറയുടെ ബോളിവുഡ് അരങ്ങേറ്റത്തെ അഭിനന്ദിച്ച് എത്തുന്നവരും കുറവല്ല.

ദുരന്തറിലൂടെ ബോളിവുഡിൽ നായികയായി അരങ്ങേറ്റം കുറിച്ചിരിക്കുകയാണ് സാറ. ബാലതാരമായാണ് സാറ സിനിമയിലെത്തുന്നത്. മുംബൈയിൽ ജനിച്ച സാറയ്ക്ക് ഇപ്പോൾ 20 വയസ് മാത്രമാണ് പ്രായം. അഞ്ച് വയസിനിടെ മക്ഡൊണാൾഡ്സ്, മാ​ഗി എന്നീ ബ്രാൻഡുകളിലുൾപ്പെടെ നൂറോളം പരസ്യച്ചിത്രങ്ങളിലും സാറ അഭിനയിച്ചു. 2011 ‌ൽ വിക്രം നായകനായെത്തിയ ദൈവ തിരുമകൾ എന്ന ചിത്രത്തിലൂടെയാണ് സാറ സിനിമയിൽ അരങ്ങേറ്റം കുറിക്കുന്നത്.

നില കൃഷ്ണ എന്ന കഥാപാത്രത്തെയാണ് സാറ ചിത്രത്തിൽ അവതരിപ്പിച്ചത്. ഇന്ത്യയിൽ ഏറ്റവും കൂടുതൽ പ്രതിഫലം കൈപ്പറ്റുന്ന ബാലതാരങ്ങളിലൊരാളായിരുന്നു സാറ. മണിരത്നം സംവിധാനം ചെയ്ത പൊന്നിയിൻ‌ സെൽവനിൽ ഐശ്വര്യ റായ് അവതരിപ്പിച്ച നന്ദിനി എന്ന കഥാപാത്രത്തിന്റെ കുട്ടിക്കാലം അവതരിപ്പിച്ചതും സാറയായിരുന്നു. ആൻമരിയ കലിപ്പിലാണ് എന്ന ചിത്രത്തിലൂടെ മലയാളത്തിലും സാറ അഭിനയിച്ചിരുന്നു.

ചിത്രത്തിലെ സാറയുടെ കഥാപാത്രവും ഏറെ ശ്രദ്ധേയമായി. രണ്ട് വർഷങ്ങൾക്ക് ശേഷം വരുന്ന രൺവീർ സിങിന്റെ ചിത്രം കൂടിയാണ് ദുരന്തർ. കരൺ ജോ​ഹർ സംവിധാനം ചെയ്ത റോക്കി ഔർ റാണി കി പ്രേം കഹാനി എന്ന ചിത്രമായിരുന്നു രൺവീറിന്റേതായി ഒടുവിൽ പ്രേക്ഷകരിലേക്കെത്തിയ ചിത്രം. യഥാർഥ സംഭവത്തെ അടിസ്ഥാനമാക്കിയൊരുക്കിയിരിക്കുന്ന ചിത്രമാണ് ദുരന്തർ. സ്പൈ ആക്ഷൻ ത്രില്ലറായെത്തുന്ന ചിത്രം സംവിധാനം ചെയ്യുന്നത് ആദിത്യ ധർ‌ ആണ്.