കൊച്ചി: കോവിഡിന്റെ രണ്ടാം തരംഗം ചലച്ചിത്രമേഖലയെ കടുത്ത പ്രതിസന്ധിയിലാക്കിയിരിക്കുകയാണ്. ഷൂട്ടിങ് നിർത്തിവയ്ക്കുകയും തിയറ്റർ അടക്കുകയും ചെയ്തതോടെ ദിവസവേതനക്കാരായ സിനിമാ പ്രവർത്തകരാണ് കൂടുതൽ ദുരിതത്തിലായത്. ഇപ്പോൾ ചലച്ചിത്ര തൊഴിലാളികളെ സഹായിക്കാൻ സഹായവുമായി എത്തിയിരിക്കുകയാണ് എഡിറ്റർ ഷമീർ മുഹമ്മദും, ക്യാമറാമാൻ ജോമോൻ ടി ജോണും. 

ഒരു ലക്ഷം രൂപ വീതം ഫെഫ്കയ്ക്ക് സംഭാവന നൽകിയിരിക്കുകയാണ് ഇരുവരും. ഇരുവർക്കും നന്ദി രേഖപ്പെടുത്തിക്കൊണ്ട് ഫെഫ്ക തന്നെയാണ് ഫേയ്സ്ബുക്കിൽ കുറിപ്പ് പങ്കുവെച്ചത്. 'കോവിഡ് മഹാമാരി മൂലം ദുരിതത്തിലായ ചലച്ചിത്ര തൊഴിലാളികളെ സഹായിക്കുന്നതിലേക്ക് ഫെഫ്ക നടത്തുന്ന പ്രവർത്തനങ്ങൾക്ക് കരുത്തേകാനായി എഡിറ്റർ ഷമീർ മുഹമ്മദും, ജോമോൻ ടി ജോണും ഓരോ ലക്ഷം രൂപ വീതം ഫെഫ്കയ്ക്ക് നൽകി. രണ്ടു പേർക്കും ഫെഫ്ക നന്ദി രേഖപ്പെടുത്തുന്നു.' - ഫെഫ്ക കുറിച്ചു. ഇതിനോടകം നിരവധി പേർക്കാണ് ഫെഫ്ക സഹായം എത്തിച്ചത്.