തനിക്ക് കേൾവിക്കുറവ് സ്ഥിരീകരിച്ചെന്ന് വെളിപ്പെടുത്തി പ്രശസ്ത പിന്നണി ​ഗായിക അൽക യാ​ഗ്നിക്. ഇൻസ്റ്റ​ഗ്രാമിൽ പങ്കുവച്ച കുറിപ്പിലൂടെയാണ് ​ഗായിക ഇക്കാര്യമറിയിച്ചത്. കുറച്ച് ആഴ്ചകൾക്ക് മുൻപ് ഒരു വിമാനയാത്രയ്ക്കിടെയായിരുന്നു തനിക്ക് കേൾവിക്കുറവ് സംഭവിച്ചതെന്ന് അൽക പറയുന്നു. അപൂർവമായ സെൻസറി ന്യൂറൽ നെർവ് കണ്ടീഷൻ സ്ഥിരീകരിച്ചുവെന്നും വൈറൽ ഇൻഫക്ഷൻ കാരണമെന്ന് ഇങ്ങനെ സംഭവിച്ചതെന്നും ​ഗായിക കുറിച്ചു.

'വിമാനത്തിൽ നിന്നിറങ്ങി നടക്കുന്നതിനിടയിലാണ് പെട്ടെന്ന് ഒന്നും കേൾക്കാൻ പറ്റാതായത്. തുടർന്നാണ് സെൻസറി ന്യൂറൽ നെർവ് കണ്ടീഷൻ സ്ഥിരീകരിച്ചത്. വളരെ ഉച്ചത്തിൽ പാട്ടുകേൾക്കുകയും ഹെഡ്ഫോൺ ഉപയോ​ഗിക്കുകയും ചെയ്യുന്നവരെല്ലാം ശ്രദ്ധിക്കണം. എല്ലാവരുടേയും സ്നേഹവും പിന്തുണയും പ്രാർഥനയും തനിക്കുണ്ടാകണമെന്നും' അൽക കുറിച്ചു. ​

ഗായകരും ആരാധകരുമടക്കം നിരവധി പേരാണ് അൽകയുടെ പോസ്റ്റിന് കമന്റ് ചെയ്തിരിക്കുന്നത്. എത്രയും വേ​ഗം സുഖം പ്രാപിക്കട്ടെയെന്നാണ് പലരും കുറിച്ചിരിക്കുന്നത്. 'എന്തോ സംഭവിച്ചുവെന്ന് എനിക്കറിയാമായിരുന്നു...തിരിച്ചു വരുമ്പോൾ കാണാം... വേ​ഗം സുഖം പ്രാപിക്കട്ടെ' - എന്നാണ് സോനു നി​ഗം കുറിച്ചത്.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

'അൽകാജി വേഗം സുഖം പ്രാപിക്കാൻ പ്രാർത്ഥിക്കുന്നു!! പതിവുപോലെ റോക്ക് ചെയ്യിക്കാൻ നിങ്ങൾ തിരികെ വരും! ഒരുപാട് സ്നേഹവും ആശംസകളും'- എന്നാണ് ​ഗായകൻ ശങ്കർ മഹാദേവൻ കുറിച്ചത്. ചെവിയുടെ ഉൾഭാ​ഗത്തേയോ ചെവിയെ മസ്തിഷ്കവുമായി ബന്ധിപ്പിക്കുന്ന ഞരമ്പിനോ ക്ഷതം സംഭവിക്കുന്ന അവസ്ഥയാണ് സെൻസറി ന്യൂറൽ നെർവ് കണ്ടീഷൻ. ഒരു ചെവിയെയോ ചിലപ്പോൾ രണ്ട് ചെവിയെയോ ഇത് ബാധിക്കാം. ഉച്ചത്തിലുള്ള ശബ്ദം, ജനിതക തകരാറുകൾ, പ്രായമാകൽ എന്നിവ കൊണ്ടെല്ലാം ഈ അവസ്ഥ സംഭവിക്കാം.