​ഗെയിം ഓഫ് ത്രോൺസിലൂടെ പ്രേക്ഷകർക്ക് സുപരിചിതയായ നടിയാണ് സോഫി ടർണർ. സീരിസിൽ സോഫി അവതരിപ്പിച്ച സൻസ സ്റ്റാർക് എന്ന കഥാപാത്രം ഏറെ കയ്യടികൾ നേടിയിരുന്നു. ഇപ്പോഴിതാ ബോളിവുഡ് സിനിമകളെക്കുറിച്ച് മനസുതുറക്കുകയാണ് നടി. ബോളിവുഡ് താരങ്ങളെ പ്രശംസിക്കുകയും ചെയ്തു സോഫി.

എന്നെങ്കിലും ഒരു ബോളിവുഡ് സിനിമയുടെ ഭാഗമാകണമെന്നും നടി പറഞ്ഞു. ഫസ്റ്റ്പോസ്റ്റിന് നൽകിയ അഭിമുഖത്തിലാണ് സോഫി ടർണർ ഇക്കാര്യം പറഞ്ഞത്. തന്റെ പുതിയ സീരിസായ സ്റ്റീലിന്റെ പ്രൊമോഷനായി എത്തിയതായിരുന്നു നടി. 'ആർആർആർ ഒരുപാട് ഇഷ്ടമായി. ഒരു ബോളിവുഡ് സിനിമയിൽ അഭിനയിക്കണമെന്ന് എനിക്ക് ആഗ്രഹമുണ്ട്. ബോളിവുഡ് സിനിമയിൽ ഡാൻസ് ചെയ്യാൻ എനിക്ക് ആഗ്രഹമുണ്ട്.

ഗംഭീര വിഷ്വലുകളാണ് ബോളിവുഡ് സിനിമകളിൽ. ഒരു വെസ്റ്റേൺ ഫിലിം സെറ്റിൽ കാണാത്ത തരം പ്രൊഡക്ഷൻ ഡിസൈനുകളാണ് ബോളിവുഡ് സിനിമകളിൽ ഉള്ളത്. ഏതെങ്കിലും ഒരു സിനിമയിൽ ഒരിക്കൽ എനിക്ക് ഭാഗമാകണം', നടി പറഞ്ഞു. അതോടൊപ്പം ബോളിവുഡിൽ ഷാരുഖ് ഖാനെയും ദീപിക പദുക്കോണിനെയുമാണ് തനിക്ക് ഏറെ ഇഷ്ടമെന്നും സോഫി കൂട്ടിച്ചേർത്തു.

അതേസമയം ആഗോള തലത്തിൽ ഉൾപ്പെടെ ശ്രദ്ധ നേടിയ സിനിമയാണ് എസ് എസ് രാജമൗലി ഒരുക്കിയ ആർ ആർ ആർ. റാം ചരണും ജൂനിയർ എൻടിആറും പ്രധാന വേഷത്തിൽ എത്തിയ സിനിമയ്ക്ക് മികച്ച പ്രതികരണം ആയിരുന്നു ലഭിച്ചത്. സ്വാതന്ത്ര്യസമര സേനാനികളായ അല്ലൂരി സീതാരാമരാജു, കൊമരം ഭീം എന്നിവരുടെ കഥയാണ് ഫാന്റസിയുടെ അകമ്പടിയില്‍ രാജമൗലി ആര്‍ആര്‍ആറില്‍ അവതരിപ്പിച്ചത്.