മലയാള സിനിമയിലെ ഹിറ്റ് ജോഡികളായി വീണ്ടും തിരിച്ചെത്തിയിരിക്കുകയാണ് സുരേഷ് ​ഗോപിയും- ജോഷിയും. ഇരുവരും ഒന്നിച്ച പാപ്പൻ മികച്ച അഭിപ്രായം നേടി മുന്നേറിക്കൊണ്ടിരിക്കുകയാണ്. തിയറ്ററുകളിൽ ആളുകളെ നിറയ്ക്കുകയാണ് ചിത്രം. ഇപ്പോൾ പാപ്പന്റെ കളക്ഷൻ റിപ്പോർട്ട് പുറത്തുവന്നിരിക്കുകയാണ്. ആദ്യ മൂന്നു ദിവസം കൊണ്ട് പതിനൊന്നു കോടി പിന്നിട്ടിരിക്കുകയാണ് ചിത്രത്തിന്റെ കളക്ഷൻ. 

11.56 കോടി രൂപയാണ് ഇതിനോടകം ചിത്രം നേടിയിരിക്കുന്നത്. ആദ്യദിനം ചിത്രം 3.16 കോടിയാണ് നേടിയിരുന്നത്. രണ്ടാം ദിനം 3.87 കോടിയും നേടി. രണ്ട് ദിവസം കൊണ്ട് ചിത്രം നേടിയത് 7.03 കോടിയാണ്. സുരേഷ് ഗോപിയുടെ എക്കാലത്തെയും മികച്ച ഓപണിംഗ് കളക്ഷനുകളില്‍ ഒന്നാണ് ഇത്. 

സൂപ്പർതാര പദവിയിലേക്കുള്ള സുരേഷ് ​ഗോപിയുടെ തിരിച്ചുവരവാണ് പാപ്പൻ. പൊറിഞ്ചു മറിയം ജോസിനു ശേഷം ജോഷിയുടെ സംവിധാനത്തില്‍ എത്തുന്ന ചിത്രത്തിൽ പൊലീസ് വേഷത്തിലാണ്  താരം എത്തിയത്. എബ്രഹാം മാത്യു മാത്തന്‍ എന്ന കഥാപാത്രത്തെയാണ് താരം അവതരിപ്പിച്ചത്.  ഡേവിഡ് കാച്ചപ്പിള്ളി പ്രൊഡക്ഷന്‍സ് നിര്‍മ്മിച്ച ചിത്രം സുരേഷ് ഗോപിയുടെ കരിയറിലെ 252-ാം സിനിമയാണ്. ക്രൈം ത്രില്ലര്‍ ചിത്രത്തില്‍ നീത പിള്ള, ​ഗോകുൽ സുരേഷ്, ഷമ്മി തിലകന്‍, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം,  സണ്ണി വെയ്ന്‍ തുടങ്ങിയവരും അഭിനയിച്ചിട്ടുണ്ട്.

ഈ വാര്‍ത്ത കൂടി വായിക്കൂ

'നിങ്ങളുടെ രാഷ്ട്രീയ എതിർപ്പുകൾ രാഷ്ട്രീയമായി തീർക്കുക', പാപ്പനെതിരെ മോശം കമന്റുകൾ; പ്രതികരണവുമായി മാലാ പാർവതി

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ