മലയാളത്തിന്റെ പ്രിയ ​ഗായകൻ ജി വേണു​ഗോപാലിന്റെ അറുപതാം പിറന്നാളായിരുന്നു ഇന്നലെ. നിരവധി പേരാണ് ​ഗായകന് പിറന്നാൾ ആശംസകൾ അറിയിച്ചത്. ഇപ്പോൾ ശ്രദ്ധ നേടുന്നത് വേണു മാമന് പിറന്നാൾ ആശംസകൾ അറിയിച്ചുകൊണ്ടുള്ള ​ഗായിക ശ്വേതാ മോഹന്റെ ​വിഡിയോ ആണ്. സ്പെഷ്യൽ പിറന്നാൾ ​ഗാനമാണ് ശ്വേതയും ടീമും പുറത്തിറക്കിയത്.

‘വേണുഗാനനാദധാരയൊഴുകി നിറയുമീ...’ എന്നു തുടങ്ങുന്ന ​ഗാനത്തിൽ നിറഞ്ഞു നിൽക്കുന്നത് പ്രിയ ​ഗായകനാണ്. വേണു​ഗോപാലിന്റെ പഴയ ചിത്രങ്ങളെല്ലാം വിഡിയോയിൽ മിന്നി മറയുന്നുണ്ട്. ഗായകന്റെ വിവാഹചിത്രവും ഭാര്യയ്ക്കും മക്കൾക്കുമൊപ്പമുള്ള കുടുംബചിത്രവുമെല്ലാം വിഡിയോയിൽ കാണാം. എന്നും ആരോഗ്യത്തോടെയും സന്തോഷത്തോടെയുമിരിക്കണമെന്നാണ് വിഡിയോ പങ്കുവെച്ചുകൊണ്ട് ശ്വേത കുറിച്ചത്.

സ്പെഷ്യൽ പിറന്നാൾ സമ്മാനത്തിന് വേണുഗോപാൽ നന്ദി പറയുകയും പാട്ട് ആരാധകർക്കായി പങ്കുവയ്ക്കുകയും ചെയ്തു. ബിന്ദു പി മേനോൻ ആണ് പാട്ടിന് വരികൾ ഒരുക്കിയിരിക്കുന്നത്. ഹൃദയവേണു ക്രിയേഷൻസാണ് സം​ഗീതം. ​ഗാനം ഇതിനോടകം ആരാധകർ ഏറ്റെടുത്തു കഴിഞ്ഞു.  ​മികച്ച അഭിപ്രായമാണ് ലഭിക്കുന്നത്.  പ്രിയ ​ഗായകന് ആശംസകളുമായി ആരാധകരും രം​ഗത്തെത്തി.