വിവാഹം ​ഗംഭീരമാക്കാനുള്ള ഏറ്റവും മികച്ച വഴിയാണ് ബ്രൈഡൽ ഷൂട്ട്. എന്തൊക്കെ കാര്യത്തിൽ കോംപ്രമൈസ് ചെയ്താലും ഫോട്ടോഷൂട്ട് ​ഗംഭീരമാക്കാനാണ് എല്ലാവരും ശ്രമിക്കുക. ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത് അങ്ങനെയൊരു ബ്രൈഡൽ ഷൂട്ടാണ്. എന്നാൽ വരന്റേയും വധുവിന്റേയും പ്രണയമല്ല മറിച്ച് ക്യാമറാമാനാണ് ഇതിലെ ഹീറോ. 

വെൻ ലവ് ക്ലിക്ക്സ് എന്ന മ്യൂസിക്കൽ വിഡിയോയിലാണ് ഫോട്ടോഷൂട്ട് പകർത്താനെത്തുന്ന ക്യാമറാമാന്റെയും റിസോര്‍ട്ടിലെ ഗസ്റ്റ് കോഓര്‍ഡിനേറ്ററായ പെണ്‍കുട്ടിയുടേയും പ്രണയം പറയുന്നത്. ബ്രൈഡൽ ഷൂട്ടിനിടെ ക്യാമറാമാൻ പെൺകുട്ടിയെ കണ്ടുമുട്ടുന്നതും തുടർന്ന് പ്രണയം പൂവിടുന്നതുമാണ് വിഡിയോയിലുള്ളത്. വൈക്കം ചെമ്മനാകരിയിലെ കളത്തില്‍ ലേക്ക് റിസോര്‍ട്ടിൽ ചിത്രീകരിച്ച വിഡിയോയുടെ ദൃശ്യഭം​ഗിയും എടുത്തു പറയേണ്ടതാണ്. 

രാജകൊട്ടാരത്തില്‍ എന്നു തുടങ്ങുന്ന ഗാനം ആലപിച്ചിരിക്കുന്നത് ഐഡിയാ സ്റ്റാര്‍ സിംഗറിലൂടെ ശ്രദ്ധേയനായ നന്ദു കിഷോര്‍ ബാബുവാണ്. അഖില്‍ സി. ആന്റണിയാണ് ലവ് ക്ലിക്കിന്റെ സംവിധാനം. ഗോവിന്ദ്കൃഷ്ണയുടെ വരികൾക്ക്  സംഗീത നൽകിയിരിക്കുന്നത് ജിയോ മൈക്കല്‍. ബാഗ് ഓഫ് സ്‌ക്രിപ്റ്റ്‌സും സില്‍വര്‍വേവ് എന്റര്‍ടെയ്ന്‍മെന്റും ചേര്‍ന്നാണ് നിർമാണം. അഭിരാമി എ എസ്, അഞ്ജന മോഹന്‍, സിദ്ധാര്‍ത്ഥ് മേനോന്‍, സ്വസ്തിക് പ്രതാപന്‍, കണ്ണന്‍ നാരായണന്‍, ഷിനു ഷാജി, ഋത്വിക് റെജി എന്നിവരാണ് വിവിധ കഥാപാത്രങ്ങളെ അവതരിപ്പിച്ചിരിക്കുന്നത്.