ഓരോ സിനിമാ പ്രേക്ഷകനെയും ഞെ‌ട്ടിച്ചു കൊണ്ടിരിക്കുകയാണ് മലയാള സിനിമ ഇൻഡസ്ട്രി. നല്ല ക‌ഥയും കണ്ടന്റുമാണെങ്കിൽ താരപദവികൾക്കൊന്നും കാര്യമില്ലെന്ന് വീണ്ടും വീണ്ടും തെളിയിക്കുകയാണ് മലയാള സിനിമയിപ്പോൾ. തുടര്‍ച്ചയായ 100 കോടി കളക്ഷനുകള്‍ കൊണ്ട് മറ്റ് ഇന്‍ഡസ്ട്രികള്‍ക്കൊപ്പം തലയുയര്‍ത്തി നില്‍ക്കുകയാണ് മോളിവുഡും.

തുടരും എന്ന ചിത്രത്തിലൂടെ കേരളത്തില്‍ നിന്ന് മാത്രം 100 കോടി നേടി തന്റെ താരസിംഹാസനം മോഹൻലാൽ വീണ്ടെടുത്തിരുന്നു. ഈ റെക്കോർഡ് ആരും തകര്‍ക്കില്ലെന്ന് കരുതിയിരുന്നപ്പോഴാണ് ലോക ചാപ്റ്റര്‍ വണ്‍ ചന്ദ്ര ഇന്‍ഡസ്ട്രി ഹിറ്റായി മാറിയത്. ഇപ്പോഴിതാ തുടരുമിന്റെ ഒന്നാം വാര്‍ഷിക ദിനത്തിൽ ചിത്രത്തിന്റെ കേരള കളക്ഷന്‍ മറ്റൊരു ചിത്രം മറികടന്നിരിക്കുകയാണ്.

പുതുമുഖങ്ങളെ അണിനിരത്തി നവാഗത സംവിധായകന്‍ സവിന്‍ സാ അണിയിച്ചൊരുക്കിയ വാഴ 2 കേരളത്തില്‍ നിന്ന് മാത്രം 119.50 കോടി നേടിക്കഴിഞ്ഞു. തുടരും നേടിയ 118 കോടിയെ മറികടന്നാണ് വാഴയുടെ ഈ തൂക്കല്‍. ചിത്രം പുറത്തിറങ്ങി വെറും 23 ദിവസം കൊണ്ടാണ് വാഴ 2 വിന്റെ ഈ നേട്ടമെന്നതാണ് മറ്റൊരു കാര്യം.

മോഹന്‍ലാലിനല്ലാതെ മറ്റാര്‍ക്കും ഈ റെക്കോർഡ് മറികടക്കാന്‍ പ്രയാസമായിരിക്കുമെന്ന് ആരാധകര്‍ അവകാശപ്പെട്ട് ഒരു വര്‍ഷമാകും മുൻപ് രണ്ടു തവണയാണ് ഈ കളക്ഷന്‍ മറികടന്നത്. തുടരെ പരാജയങ്ങൾ വന്നതോടെ ക്ഷീണത്തിലായിരുന്ന മോഹൻലാലിനും ആരാധകർക്കും ഒരു പുതുജീവൻ നൽകിയ ചിത്രമാണ് തരുൺ മൂർത്തി സംവിധാനം ചെയ്ത തുടരും. മോഹന്‍ലാല്‍ ആരാധകര്‍ക്ക് ഒരു സര്‍പ്രൈസ് ട്രീറ്റ് കൂടിയായിരുന്നു തുടരും. മോഹന്‍ലാലിലെ നടനെയും താരത്തെയും ഒരുപോലെ ഉപയോഗിച്ച ചിത്രമായിരുന്നു ഇത്.