വിജയ് നായകനാക്കുന്ന ബീസ്റ്റിലെ അറബിക് കുത്ത് വൻ വൈറലായിരുന്നു. അറബിക്കുത്ത് തീർത്ത തരം​ഗം തീരുന്നതിനു മുൻപായി പുതിയ പാട്ടുമായി എത്തിയിരിക്കുകയാണ് അണിയറ പ്രവർത്തകർ. 'ജോളി ഓ ജിംഖാനാ' എന്നാരംഭിക്കുന്ന രണ്ടാമത്തെ ​ഗാനത്തിന്റെ ലിറിക് വിഡിയോ ആണ് പുറത്തുവന്നത്. ​ഗാനം റിലീസായി മണിക്കൂറുകൾക്കകം യൂട്യൂബ് ട്രെൻഡിങ്ങിൽ ഒന്നാം സ്ഥാനത്ത് എത്തിയിരിക്കുകയാണ്. 

വിജയ് ആലപിച്ചിരിക്കുന്ന ​ഗാനത്തിന് സം​ഗീതം നിർവഹിച്ചിരിക്കുന്നത് അനിരുദ്ധാണ്. കു കാര്‍ത്തിക്കാണ് ഗാനത്തിനായി വരികളെഴുതിയിരിക്കുന്നത്. ഹോളിഡേ മുഡിലുള്ള ​ഗാനത്തിൽ അടിപൊളി നൃത്തച്ചുവടുകളുമായി വിജയും പൂജ ഹെഗ്‌ഡെയും പ്രത്യക്ഷപ്പെടുന്നുണ്ട്. ജാനി മാസ്റ്റാണ് കൊറിയോഗ്രാഫര്‍. മാസ്റ്റേഴ്‌സിലെ കുട്ടി സ്റ്റോറി എന്ന സൂപ്പര്‍ഹിറ്റിന് ശേഷം അനിരുദ്ധിന്റെ സംഗീതസംവിധാനത്തില്‍ വിജയ് വീണ്ടും ഗാനമാലപിക്കുന്നു എന്ന പ്രത്യേകതയും ഗാനത്തിനുണ്ട്.

വൻ സ്വീകാര്യതയാണ് വിജയ് യുടെ ​ഗാനത്തിന് ആരാധകരിൽ നിന്ന് ലഭിക്കുന്നത്. ഇതിനോടകം 11 കോടിയിൽ അധികം പേരാണ് ​ഗാനം കണ്ടത്. നെൽസൺ കഥ എഴുതി സംവിധാനം ചെയ്തിരിക്കുന്ന ബീസ്റ്റ് നിർമിച്ചത് സൺ പിക്ചേഴ്സാണ്. സിനിമയില്‍ സെല്‍വരാഘവന്‍, യോഗിബാബു, ഷൈന്‍ ടോം ചാക്കോ, സതീഷ്, അപര്‍ണ ദാസ് തുടങ്ങി വന്‍താരനിര അണിനിരക്കുന്നുണ്ട്.