അഹങ്കാരം കൊണ്ട് താനൊഴിവാക്കിയ സിനിമയാണ് ഓൾ വി ഇമാജിൻ അസ് ലൈറ്റ് എന്ന് നടി വിൻ‌സി അലോഷ്യസ്. ആ സിനിമ വന്നപ്പോൾ എനിക്ക് പറ്റിയ സിനിമയല്ലെന്ന് പറഞ്ഞ് ഒഴിവാക്കി വിട്ടു. ആ സിനിമ ഇന്ന് കാനിൽ എത്തി നിൽക്കുകയാണെന്നും വിൻസി പറഞ്ഞു. ഒരു പൊതു ചടങ്ങിൽ സംസാരിക്കവേയാണ് വിൻസി ഇക്കാര്യം തുറന്നു പറഞ്ഞത്. ഇതിന്റെ വിഡിയോയും ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്.

"കഴിവുണ്ടേൽ ഞാനെത്തുമെന്ന അഹങ്കാരത്തില്‍ തന്നെ നിന്നു. അതിന് ഒരു ചെറിയ ഉദാഹരണം പറയാം. അതെന്റെ മാതാപിതാക്കള്‍ക്കും അറിയില്ല. നിങ്ങള്‍ക്ക് മുന്നില്‍ ഒരു കുമ്പസാരം പോലെ പറയാം. അഹങ്കാരം കയറിയ സമയത്താണ് ഒരു സിനിമ എനിക്ക് വരുന്നത്. ആ സിനിമ വന്നപ്പോള്‍ എനിക്ക് പറ്റിയ സിനിമയല്ലെന്ന് പറഞ്ഞ് ഒഴിവാക്കി വിട്ടു. ആ സിനിമ ഇന്ന് കാനില്‍ എത്തി നില്‍ക്കുന്നു.

'ഓള്‍ വി ഇമാജിന്‍ അസ് ലൈറ്റ്'. കനി കുസൃതി, ദിവ്യ പ്രഭയൊക്കെയുള്ള സിനിമ. എല്ലാവരും അടുത്തകാലത്ത് സംസാരിച്ചുകൊണ്ടിരിക്കുന്ന ചിത്രം. അത് എന്റെ അഹങ്കാരത്തിന്റെ പേരില്‍ ഒഴിവാക്കിയിട്ടുണ്ട്, അങ്ങനെ പലതും. മുകളിലേക്ക് പോയ ഞാന്‍ ഇപ്പോള്‍ താഴേക്ക് എത്തി നില്‍ക്കുകയാണ്. ഒറ്റ കാര്യമേയുള്ളൂ, ഉള്ളില്‍ വിശ്വാസം വേണം. പ്രാർഥന വളരെ പ്രാധാന്യമുള്ളതാണ്.

വിജയ് സേതുപതിയുടെ 'മഹാരാജ' കണ്ട് പൊട്ടിക്കരഞ്ഞ് ചൈനീസ് പ്രേക്ഷകർ; വൈറലായി വിഡിയോ

ഞാന്‍ പ്രാര്‍ഥന കുറച്ചൊരു സമയമുണ്ടായിരുന്നു, പ്രാര്‍ഥന ഇല്ലാതാക്കിയ സമയമുണ്ടായിരുന്നു. രണ്ടിന്റെയും വ്യത്യാസം വളരെ വ്യക്തമാണ്. പ്രാര്‍ഥനയുള്ള സമയത്ത്, മനസില്‍ നന്മയുണ്ടായിരുന്ന സമയത്ത് എത്തേണ്ടിയിരുന്ന സ്ഥലത്ത് ഞാന്‍ എത്തിയിരുന്നു. ഇതെല്ലാം മാറി നിന്ന സമയത്ത് ജീവിത്തില്‍ ഒരു സ്ഥലത്തും ഞാന്‍ എത്തിയിട്ടില്ല".- വിൻസി വിഡിയോയിൽ പറയുന്നു.