സഹോദരന് പിറന്നാള്‍ ആശംസകള്‍ക്കൊപ്പം സാറ അലി ഖാന്‍ പങ്കുവച്ച ചിത്രത്തിനു വിമര്‍ശനം. താരത്തിന്റെ വസ്ത്രധാരണവും ചിത്രത്തില്‍ നില്‍ക്കുന്ന രീതിയുമാണ് പലരേയും ചൊടിപ്പിച്ചത്. ഇക്കാര്യം വ്യക്തമാക്കുന്ന നിരവധി കമന്റുകളാണ് ഇന്‍സ്റ്റഗ്രാമില്‍ പങ്കുവച്ച ചിത്രത്തിനു താഴെ പ്രത്യക്ഷപ്പെട്ടത്. 

മാര്‍ച്ച് 5ന് ആയിരുന്നു സാറയുടെ സഹോദരന്‍ ഇബ്രാഹിമിന്റെ ജന്മദിനം. ജന്മദിനത്തില്‍ സാറ സഹോദരനൊപ്പമില്ല. വളരെ മധുരമായ ആശംസയാണ് താരം ഇന്‍സ്റ്റഗ്രാമിലൂടെ പങ്കുവച്ചത്. അമ്മ അമൃത സിങ്ങിനും സഹോദരന്‍ ഇബ്രാഹിമിനുമൊപ്പം അടുത്തിടെ മാലദ്വീപിലേക്ക് അവധി ആഘോഷിക്കാനായി സാറ പോയിരുന്നു. ഈ സമയത്തെടുത്ത ചിത്രമാണ് ജന്മദിനാശംസയ്‌ക്കൊപ്പം പങ്കുവച്ചത്. ചിത്രത്തില്‍ ബിക്കിനിയാണ് സാറയുടെ വേഷം. ''സന്തോഷ ജന്മദിനം സഹോദരാ. നിനക്കറിയാവുന്നതിലും കൂടുതല്‍ ഞാന്‍ നിന്നെ സ്‌നേഹിക്കുന്നു. ഇന്ന് നിന്നെ ഒരുപാട് മിസ് ചെയ്യുന്നു. നിന്നോടൊപ്പം ഉണ്ടായിരുന്നെങ്കില്‍ എന്നു ഞാന്‍ ആഗ്രഹിക്കുന്നു''– ചിത്രത്തിനൊപ്പം സാറ കുറിച്ചു. 

എന്നാല്‍ ചിത്രത്തിനു താഴെ സദാചാര കമന്റുകള്‍ നിറഞ്ഞു. സാറയുടെ വസ്ത്രധാരണം മുതല്‍ മാതാപിതാക്കളെ അപഹസിക്കുന്ന തരത്തിലുള്ള കമന്റുകള്‍ വരെ കൂട്ടത്തിലുണ്ടായിരുന്നു. സഹോദരനൊപ്പം എങ്ങനെ നില്‍ക്കണം എന്നറിയില്ലേ എന്നും അത് മാതാപിതാക്കളാണ് പഠിപ്പിക്കേണ്ടതെന്നുമെല്ലാം കമന്റുകളുണ്ട്. സാറയെ അനുകൂലിച്ച് നിരവധിപ്പേര്‍ രംഗത്തെത്തി. വസ്ത്രമോ ചിത്രമോ അല്ല പ്രശ്‌നമെന്നും കാണുന്നവരുടെ മനസ്സിലെ ദുഷിച്ച ചിന്തകള്‍ പുറത്തു വരികയാണെന്നും അവര്‍ മറുപടി നല്‍കി. 

ബോളിവുഡ് താരം സെയ്ഫ് അലി ഖാന്റെയും അമൃത സിങ്ങിന്റെയും മക്കളാണ് സാറയും ഇബ്രാഹിമും. 2004ല്‍ സെയ്ഫും അമൃതയും വിവാഹമോചിതരായി. 2012ല്‍ സെയ്ഫ് നടിയായ കരീന കപൂറിനെ വിവാഹം ചെയ്തു. ഈ ബന്ധത്തില്‍ തൈമൂര്‍ എന്നൊരു മകനുണ്ട്. 2018ല്‍ കേദാര്‍നാഥ് എന്ന സിനിമയിലൂടെയാണ് സാറ അലി ഖാന്‍ ബോളിവുഡില്‍ അരങ്ങേറ്റം കുറിച്ചത്. കൂലി ചീ.1 എന്ന സിനിമയാണ് സാറയുടെ റിലീസിന് എത്തുന്ന അടുത്ത ചിത്രം.