ആരാധകർ ഏറെ ആകാംഷയോടെ കാത്തിരിക്കുന്ന താരവിവാഹമാണ് രൺബീർ-ആലിയ പ്രണയജോഡിയുടേത്. പ്രണയത്തിലാണെന്ന് വെളിപ്പെടുത്തിയ താരങ്ങളുടെ വിവാഹം സംബന്ധിച്ച് നിരവധി അഭ്യൂഹങ്ങളാണ് പുറത്തുവരുന്നത്. എന്നാൽ ഈ വർഷം ഡിസംബറിൽ കാത്തിരുന്ന ആ താരവിവാഹം നടക്കുമെന്നാണ് ഏറ്റവും പുതിയ റിപ്പോർട്ട്. 

ഓപ്പൺ മാഗസിനിൽ ചലച്ചിത്ര നിരൂപകൻ രാജീവ് മസന്ദ് ആണ് രൺബീർ-ആലിയ വിവാഹക്കാര്യം പുറത്തുവിട്ടത്. ഇരുവരും ഒന്നിച്ചെത്തുന്ന അയാൻ മുഖർജിയുടെ ബ്രഹ്മാസ്ത്ര എന്ന ചിത്രം റിലീസിനെത്തുന്നതിന് പിന്നാലെയായിരിക്കും താരവിവാഹം എന്നാണ് വിവരം. ഡിസംബർ നാലിനാണ് ബ്രഹ്മാസ്ത്ര തിയേറ്ററുകളിലെത്തുന്നത്. 

കുടുംബാംഗങ്ങളെ വിവാഹ തിയതി അറിയിച്ചെന്നും വിവാഹ ഒരുക്കങ്ങൾ തുടങ്ങിയെന്നുമാണ് റിപ്പോർട്ടുകൾ. ‌കപൂര്‍ കുടുംബത്തിലെ ഇളംതലമുറക്കാരനായ അര്‍മാന്‍ ജെയിന്റെ വിവാഹത്തിന് രൺബീറിനും അമ്മ നീതു സിങ്ങിനും ഒപ്പമാണ് ആലിയ എത്തിയത്. ഇതോടെയാണ് ഇരുവരുടെയും വിവാഹവാർത്തകൾ വീണ്ടും ശ്രദ്ധനേടുന്നത്.