ബോളിവുഡ് സുന്ദരി കങ്കണ റണൗത്ത് അഭിനയിച്ച് തകര്‍ത്ത ക്വീനിന്റെ റീമേക്ക് ചിത്രങ്ങളുടെ ടീസര്‍ എത്തി. മലയാളം, തമിഴ്, തെലുങ്ക്, കന്നഡ ഭാഷകളിലായിട്ടാണ് റീമേക്കുകള്‍ എത്തുന്നത്. മലയാളത്തില്‍ മഞ്ജിമ മോഹന്‍ ആണ് നായികയായി എത്തുന്നത്. സംസം എന്ന് പേരിട്ടിരിക്കുന്ന ചിത്രത്തില്‍ സണ്ണി വെയ്‌നും അഭിനയിക്കുന്നുണ്ട്. 

തമിഴ് റീമേക്കായ പാരിസ് പാരിസില്‍ കാജല്‍ അഗര്‍വാള്‍ ആണ് നായിക. ദാറ്റ് ഈസ് മഹാലക്ഷ്മി എന്ന തെലുങ് പതിപ്പില്‍ തമന്നയും കന്നഡയില്‍ പരുള്‍ യാദവുമാണ് നായികയായി എത്തുന്നത്. ബട്ടര്‍ഫ്‌ളൈ എന്നാണ് കന്നഡ ചിത്രത്തിന്റെ പേര്. കങ്കണയുടെ ക്വീനിന്റെ അതേ പതിപ്പിലാണ് ചിത്രങ്ങള്‍ എടുത്തിരിക്കുന്നത്. ചിത്രത്തിലെ കഥാപാത്രങ്ങള്‍ വ്യത്യസ്തമാണെങ്കിലും അണിയറപ്രവര്‍ത്തകര്‍ ഒന്നാണ്. രമേഷ് അരവിന്ദാണ് ചിത്രം സംവിധാനം ചെയ്യുന്നത്. 

ക്വീനിലെ അഭിനയത്തിന് കങ്കണയ്ക്ക് മികച്ച നടിയ്ക്കുള്ള ദേശിയ പുരസ്‌കാരം ലഭിച്ചിരുന്നു. വിവാഹത്തിന്റെ തലേ ദിവസം പ്രതിശ്രുത വരന്‍ വിവാഹത്തില്‍ നിന്ന് പിന്‍വാങ്ങുന്നതും തുടര്‍ന്ന് പാരിസിലേക്ക് ഒറ്റയ്ക്ക് യാത്ര പോകുന്നതുമാണ് ചിത്രം.