മഹാബലിപുരത്തെ കടല്‍ത്തീരം വൃത്തിയാക്കുന്ന പ്രധാനമന്ത്രി നരേന്ദ്ര മോദിയുടെ വീഡിയോ വലിയ ചര്‍ച്ചയായിരിക്കുകയാണ്. ചൈനീസ് പ്രസിഡന്റ് ഷി ജിന്‍പിങ്ങുമായുള്ള അനൗപചാരിക ഉച്ചകോടിയുടെ വേദിയായ കടല്‍ത്തീരമാണ് മോദി വൃത്തിയാക്കുന്നതായി വീഡിയോയില്‍ കാണാനാകുന്നത്. 

പ്രഭാതസവാരിയ്ക്കിടെ തീരത്തടിഞ്ഞ മാലിന്യങ്ങള്‍ നീക്കം ചെയ്തുവെന്ന് വ്യക്തമാക്കി മോദി തന്നെയാണ് വീഡിയോ പോസ്റ്റ് ചെയ്തതും. ഈ വീഡിയോ ബിജെപി ഗ്രൂപ്പുകളിലൂടെയും മറ്റും പെട്ടെന്ന് തന്നെ വൈറലാവുകയും ചെയ്തു. എന്നാല്‍ വീഡിയോയുടെ പിന്നാമ്പുറ കഥകളെല്ലാം വ്യക്തമാക്കി നിരവധിയാളുകള്‍ വിമര്‍ശനങ്ങളുമായും രംഗത്തെത്തുന്നുണ്ട്.

നടന്‍ പ്രകാശ് രാജും മോദിയെ പരോക്ഷമായി വിമര്‍ശിച്ച് രംഗത്തെത്തിയിരിക്കുകയാണ്. പ്രധാനമന്ത്രിയുടെ സുരക്ഷ എവിടെയാണെന്നും വിദേശത്ത് നിന്ന് അതിഥികള്‍ എത്തിയിരിക്കുന്ന അവസരത്തില്‍ എന്തുകൊണ്ട് കടല്‍ത്തീരം വൃത്തിയാക്കിയില്ലെന്നും പ്രകാശ് രാജ് ചോദിക്കുന്നു. ട്വിറ്ററിലൂടെയായിരുന്നു പ്രകാശ് രാജിന്റെ വിമര്‍ശനം.

എവിടെയാണ് നമ്മുടെ നേതാവിന്റെ സുരക്ഷ? പ്രദേശം വൃത്തിയാക്കാന്‍ അദ്ദേഹത്തെ, ഒറ്റയ്ക്ക് ഒരു ക്യാമറാമാനൊപ്പം അയച്ചത് എന്തിന്? വിദേശത്ത് നിന്ന് ഒരു സംഘം എത്തിയിരിക്കുന്ന സാഹചര്യത്തില്‍ ഈ പ്രദേശം വൃത്തിയാക്കാതിരിക്കാന്‍ ബന്ധപ്പെട്ട അധകൃതര്‍ക്ക് എങ്ങനെ ധൈര്യം വന്നു പ്രകാശ് രാജ് ട്വീറ്റ് ചെയ്തു.