ബിജു മേനോന്‍ പ്രധാന വേഷത്തില്‍ എത്തുന്ന ആദ്യരാത്രിയുടെ ട്രെയ്‌ലര്‍ പുറത്ത്. വെള്ളിമൂങ്ങ എന്ന ആദ്യ ചിത്രത്തിലൂടെ കയ്യടി നേടിയ ജിബു ജേക്കബാണ് ചിത്രം സംവിധാനം ചെയ്യുന്നത്. കല്യാണ ബ്രോക്കറായാണ് ചിത്രത്തില്‍ ബിജു മേനോന്‍ എത്തുന്നത്. വിനീത് ശ്രീനിവാസന്‍, ടൊവിനോ തോമസ്, ആസിഫ് അലി എന്നിവരുടെ ഫേയ്‌സ്ബുക്ക് പേജുകളിലൂടെയാണ് ട്രെയ്‌ലര്‍ പുറത്തിറക്കിയത്. 

ബിജു മേനോനൊപ്പം, അജു വര്‍ഗീസും പ്രധാന വേഷത്തില്‍ എത്തുന്നുണ്ട്. തണ്ണീര്‍ മത്തന്‍ ദിനങ്ങളിലൂടെ ശ്രദ്ധേയയായ അനശ്വര രാജനാണ് ചിത്രത്തിലെ നായിക. തമാശയ്ക്ക് പ്രാധാന്യം നല്‍കിക്കൊണ്ടുള്ളതാണ് ചിത്രം. മുന്തിരിവള്ളികള്‍ തളിര്‍ക്കുമ്പോള്‍ എന്ന ചിത്രത്തിന് ശേഷമുള്ള ജിബുവിന്റെ മൂന്നാമത്തെ ചിത്രമാണ് ഇത്. 

വിജയരാഘവന്‍, മനോജ് ഗിന്നസ്, ജയന്‍ ചേര്‍ത്തല, മാലാ പാര്‍വതി, സര്‍ജനു, അശ്വിന്‍ എന്നിവരാണ് മറ്റു കഥാപാത്രങ്ങളെ അവതരിപ്പിക്കുന്നത്. ക്വീന്‍ എന്ന ചിത്രത്തിലൂടെ ശ്രദ്ധേയരായ ഷാരിസ് ജിബിന്‍ എന്നിവര്‍ ചേര്‍ന്നാണ് കഥയും തിരക്കഥയും സംഭാഷണവും ഒരുക്കിയിരിക്കുന്നത്. ബിജിബാല്‍ ആണ് സംഗീതം. ശ്രീജിത്ത് നായരാണ് ചിത്രത്തിന്റെ ചായാഗ്രഹണം. സെന്‍ട്രല്‍ പിക്‌ചേഴ്‌സിന്റെ ബാനറില്‍ ആണ് ചിത്രം നിര്‍മിക്കുന്നത്.