നീണ്ട കാത്തിരിപ്പിന് വിരാമമിട്ട് കാളിദാസ് ജയറാമിന്റെ ആദ്യ മലയാളം ചിത്രമായ പൂമരം ഇന്ന് തീയറ്ററുകളില്‍ എത്തും. സോഷ്യല്‍ മീഡിയയിലെ ട്രോളുകളുടെ അകമ്പടിയോടെയാണ് ചിത്രത്തിന്റെ വരവ്. ആദ്യ ഗാനം പുറത്തുവിട്ട് ഒന്നര വര്‍ഷത്തിന് ശേഷമാണ് എബ്രിഡ് ഷൈന്‍ സംവിധാനം ചെയ്ത ചിത്രം എത്തുന്നത്. 

കാളിദാസിന്റെ കന്നി ചിത്രത്തിന് ആശംസകള്‍ അറിയിച്ചുകൊണ്ട് മോഹന്‍ലാല്‍ രംഗത്തെത്തി. പൂമരത്തിന്റെ പോസ്റ്റര്‍ ട്വിറ്ററിലൂടെ ഷെയര്‍ ചെയ്താണ് താരപുത്രന് ആശംസകള്‍ നേര്‍ന്നത്. 

സിനിമയുടെ റിലീസ് സംബന്ധിച്ച് നിലനിന്നിരുന്ന അനിശ്ചിതത്വമാണ് പൂമരത്തെ ട്രോളന്മാരുടെ പ്രധാന വേട്ടമൃഗമാക്കിയത്. ചിത്രത്തിലെ ഞാനും ഞാനുമെന്റാളും എന്ന ഗാനം വൈറലായതോടെ വലിയ പ്രതീക്ഷയോടെയാണ് ആരാധകര്‍ ചിത്രത്തിനായി കാത്തിരുന്നത്. എന്നാല്‍ ചിത്രത്തിന്റെ റിലീസ് സംബന്ധിച്ച് പിന്നീട് വിവരമൊന്നുമുണ്ടായില്ല. നീണ്ടനാളത്തെ അനിശ്ചിതത്വത്തിനൊടുവില്‍ മാര്‍ച്ച് 9 ന് റിലീസ് പ്രഖ്യാപിച്ചു. എന്നാല്‍ അവസാന നിമിഷം ഒരാഴ്ചത്തേക്ക് കൂടി റിലീസ് മാറ്റുകയായിരുന്നു.