ആര്‍ജെ മാത്തുക്കുട്ടി പ്രധാന വേഷത്തില്‍ എത്തിയ ഹിറ്റ് ഷോര്‍ട്ട് ഫിലിം കുളിസീനിന്റെ രണ്ടാം ഭാഗം വരുന്നു. ജൂഡ് ആന്റണിയും സ്വാസികയുമാണ് പുതിയ ഷോര്‍ട്ട്ഫിലിമില്‍ പ്രധാന വേഷങ്ങളിലെത്തുന്നത്. മറ്റൊരു കടവില്‍- കുളിസീന്‍ 2 എന്ന് പേരിട്ടിരിക്കുന്ന ചിത്രത്തിന്റെ ആദ്യ ടീസര്‍ പുറത്തുവന്നു. 

ചുവന്ന സാരിയുടുത്ത് വെള്ളത്തില്‍ മുങ്ങി നിവരുന്ന സ്വാസ്തയുടെ രംഗങ്ങള്‍ക്കൊപ്പമാണ് ടീസര്‍. കുളിസീന്‍ സംവിധാനം ചെയ്ത രാഹുല്‍ കെ. ഷാജി തന്നെയാണ് മറ്റൊരു കടവിലും ഒരുക്കുന്നത്. ഈ വര്‍ഷം മാര്‍ച്ചിലാണ് ചിത്രം റിലീസ് തീരുമാനിച്ചിരിക്കുന്നത്. വമ്പന്‍ താരനിരയിലാണ് കുളിസീന്‍ 2 വരുന്നത്. അല്‍താഫ് മനാഫ്, പാഷാണം ഷാജി, ബോബന്‍ സാമുവല്‍ , മാത്തുക്കുട്ടി , അര്‍ജുന്‍ ഗോപാല്‍ എന്നിവരും ചിത്രത്തില്‍ അഭിനയിക്കുന്നുണ്ട്.

2013ലാണ് കുളിസീനിന്റെ ആദ്യ ഭാഗം പുറത്തുവന്നത്. ആര്‍. ജെ. മാത്തുക്കുട്ടിയും വൈഗയും അഭിനയിച്ച ചിത്രം യൂട്യൂബില്‍ തരംഗമായിരുന്നു. ഇതോടെയാണ് ഏഴു വര്‍ഷത്തിന് ശേഷം രണ്ടാം ഭാഗം ഒരുക്കുന്നത്. ആര്യ ഹെന്ന പ്രൊഡക്ഷന്‍സിന്റെ ബാനറില്‍ സുനില്‍ നായരാണ് മറ്റൊരു കടവില്‍ നിര്‍മിക്കുന്നത്. രാഹുല്‍ രാജാണ് സംഗീതം ഒരുക്കുന്നത്. തിരക്കഥ സംഭാഷണം ഒരുക്കുന്നത് സുമേഷ് മധു.