നടി മഞ്ജു വാരിയരുടെ സഹോദരനും നടനുമായ മധു വാരിയർ ആദ്യമായി സംവിധാനം ചെയ്യുന്ന ‘ലളിതം സുന്ദരം’ എന്ന സിനിമയുടെ ചിത്രീകരണം ആരംഭിച്ചു. മഞ്ജു വാരിയർ നായികയായി എത്തുന്ന ചിത്രത്തിൽ ബിജു മേനോന്‍ കേന്ദ്രകഥാപാത്രമായെത്തുന്നു. വണ്ടിപ്പെരിയാറുള്ള മൗണ്ട് ബംഗ്ലാവിലാണ് സിനിമയുടെ ചിത്രീകരണം ആരംഭിച്ചിരിക്കുന്നത്. 

മഞ്ജു വാര്യർ നിർമിക്കുന്ന ആദ്യ കൊമേർസ്യൽ ചിത്രം എന്ന പ്രത്യേകതയും ഈ സിനിമയ്ക്കുണ്ട്. മഞ്ജു വാരിയർ പ്രൊഡക്‌ഷൻസ് സെഞ്ച്വറിയുടെ സഹകരണത്തോടെയാണ് നിർമാണം. ദിലീഷ് പോത്തൻ, സൈജു കുറുപ്പ്, രഘുനാഥ് പലേരി, സറീന വഹാബ്, ദീപ്തി സതി തുടങ്ങി വലിയ താരനിര തന്നെ ചിത്രത്തിലുണ്ട്. പ്രമോദ് മോഹനാണ് ചിത്രത്തിന്റെ തിരക്കഥ. 

കൃഷ്ണഗുഡിയിൽ പ്രണയകാലത്ത്, കുടമാറ്റം, പ്രണയവർണങ്ങൾ, കണ്ണെഴുതി പൊട്ടുംതൊട്ട് എന്നിങ്ങനെ മഞ്ജു വാര്യർ - ബിജു മേനോൻ കൂട്ടുകെട്ടിൽ പിറന്ന സൂപ്പർഹിറ്റ് ചിത്രങ്ങൾക്ക് ശേഷം വലിയൊരു ഇടവേളയ്ക്ക് വിരാമമിട്ടാണ് ലളിതം സുന്ദരം ഒരുങ്ങുന്നത്.